Անսպասելի երաշտի պատճառով Կալիֆոռնիայի նահանգապետ Ջերի Բրաունը հրամանագիր է ստորագրել ջրօգտագործումը 25%-ով նվազեցնելու մասին: Սակայն Կալիֆոռնիայի ոչ բոլոր բնակիչներն են հետևում այդ պահանջին:
Լոս Անջելեսի ջրային պաշարների և էներգետիկայի հարցերով փորձագետ Թոմաս Մարտինեսը իրավունք ունի պատժելու նրանց, ովքեր չեն տնտեսում ջուրը: Նա նշում է, որ հատկապես միջին տարիքի մարդիկ են անտարբեր այդ խնդրին. «Նրանք չեն գիտակցում, որ այդ ճգնաժամը վերաբերում է յուրաքանչյուրին, չեն հասկանում, թե ջրի դեֆիցիտը ինչպես կարող է ազդել մեզ վրա»։
Ջուրը հատկապես շռայլորեն են օգտագործում Բևերլի Հիլզում, որտեղ ստիպված են խիստ միջոցների դիմել նրանց հանդեպ, ովքեր ջրում են տնամերձ մարգերը: Հետևանքները կարող են տարբեր լինել՝ նախազգուշացումից մինչև մոտ հազար դոլարի տուգանք: Սա առաջացնում է շատերի դժգոհությունը:
Մարտինեսի խոսքով՝ ավելացել են խախտումների մասին հայտարարությունները, հարևանների` միմյանց մատնելու դեպքերը: Ջուրը շռայլելու մեջ մեղադրվում են նաև հոլիվուդյան աստղերը, որոնց շքեղ կալվածքների լուսանկարները հաճախ են հայտնվում Twitter-ում:
