Երեկ կայացան Չեմպիոնների լիգայի քառորդ եզրափակիչ վերջին երկու պատասխան հանդիպումները:
Մադրիդի «Ռեալ»-ը հյուրընկալվելիս՝ նվազագույն հաշվով առավելության հասավ «Տոտենհեմ»-ի նկատմամբ` այդպիսով ընդհանուր դիմակայության արդյունքը դարձնելով 5:0, և դուրս եկավ կիսաեզրափակիչ: Հանդիպման 50-րդ րոպեին հանդիպման միակ գոլը խփեց Ռոնալդուն, որի հարվածից հետո Գոմեսը պարտավոր էր փրկել իր թիմին, սակայն նրա կոպիտ սխալները վաղուց արդեն ոչ ոքի չեն զարմացնում:
Մյուս խաղում «Ինտեր»-ը կիսաեզրափակիչի ուղեգիր նվաճելու համար պետք է Գերմանիայում «Շալկե»-ին հաղթեր 4 գնդակի տարբերությամբ: Այստեղ նույնպես հրաշք տեղի չունեցավ. իտալացիները ոչ միայն չկարողացան հասնել անհրաժեշտ արդյունքի, այլև 2:1 հաշվով պարտություն կրեցին:
Ինչպես Չեմպիոնների լիգայի մյուս բոլոր հանդիպումներում, «Շալկե»-ի գլխավոր գործող անձը կրկին լեգենդար Ռաուլն էր, որը 45-րդ րոպեին առաջ մղեց իր թիմին: Երկրորդ խաղակեսում թիմերը մեկական գնդակ փոխանակեցին. 49-րդ րոպեին անկյունայինի խաղարկումից հետո Մոտտան հավասարեցրեց հաշիվը, իսկ 81-րդ րոպեին Բենեդիկտ Հյովեդեսի խփած գոլն ընդհանուր դիմակայության հաշիվը դարձրեց 7:3:
«Շալկե»-ն կիսաեզրափակիչում է, որտեղ կմրցի «Մանչեսթեր Յունայթեդ»-ի հետ: Մյուս կիսաեզրափակիչում կհանդիպեն «Բարսելոնա»-ն ու «Ռեալ»-ը:
