Հայաստանի տնտեսական ծանր վիճակից շարքային քաղաքացիներից բացի բարձրաձայն դժգոհում են նաև իշխանության կարկառուն ներկայացուցիչները, սակայն սա չի խանգարում, որ իշխանությունները ռուսական ընկերության ՀԷՑ-ի սխալ մենեջմենթի, թալանի հետևանքով կուտակված պարտքերը դարձյալ մարեն քաղաքացիների գրպանից: ԸնկերությունՆ արդեն Հանրային ծառայությունների հանձնաժողով է ներկայացրել սակագինը 15-17 դրամով բարձրացնելու հայտը: Էլեկտրաէներգիայի սակագնի թանկացման բոթից ահաբեկվել են քաղաքացիները, թե ինչպե՞ս պետք է դուրս գան այս ծանր լծի տակից, թեմայի շուրջ զրուցեցինք ՀՀԿ խմբակցության պատգամավոր Համլետ Հարությունյանի հետ: Բացի սոցիալական կյանքի վատթարացումից, հարցրինք նաև Սյունիքի բդեշխ Սուրիկ Խաչատրյանի որդու քրեական արկածներից, նրանց դեմ իրավապահ մարմինների անկարողությունից: Խոսեց նաև Արտաշատում քաղաքապետի ընտրություններից, որտեղ շուտով ՀՀԿ-ն փտած նախնադարյան գործելաոճով պետք է«իշխան» կարգի վարչապետի որդուն:
–Պարոն Հարությունյան, ՀԷՑ-ը սակագնի թանկացման հայտ է ներկայացրել տնտեսական այս ծանր պայմաններում, ինչպե՞ս պետք է բնակչությունը դուրս գա այս բեռի տակից:
-Բարդ հարց եք տալիս, բնակչությանը շատ հուզող, որոնց թվում ես էլ եմ, իհարկե, չի կարելի այդպես թողնել, որ գներն աճեն, պետք է հանրային ծառայություններն օբյեկտիվ գնահատական տան և հնարավորին չափ զսպեն այդ գները: Գիտեք, էլկտրացանցերում տիրող իրավիճակը խայտառակ է, ես կարող եմ ասել, և ավելի շատ պետք է հենց էդ աուդիտը արվի էլեկտրացանցերում: Թե ինչպես են ստուգում, ինչպես են հաշվիչները գրում, որտեղ են տեղադրված այդ հաշվիչները: Օրինակ` իմ հաշվիչը մի կիլոմետր հեռու է մեր տնից և պատկերացրեք այդ կորուստները , և ցանկացած առաջարկություն, որ մոտիկացնեն և այլն… և այլն: Պատկերացնո՞ւմ եք, ամբողջ աշխարհն իրենց չի վստահում, իրենք էլ մեզ չեն վստահում: Եվ միանգամից 17 դրամ բարձրացնելն ուղղակի չի կարելի :
– Ռուսական ընկերությունը սխալ մենեջմենթի հետևանքով կուտակված պարտքերը փորձում է դարձյալ լուծել քաղաքացիների գրպանի հաշվին, արդյո՞ք անելիք չունեն կառավարությունը, պատգամավորները:
-Դրա համար կա հանրային ծառայությունների խորհուրդը, պատգամավորը չի կարող, չունի աուդիտ անցկացնելու իրավունք, իսկ իրենք ունեն, եթե սխալ մենջմենթի հետևանք է, ուրեմն գները չպիտի բարձրացնեն: Իսկ ես, կարծում եմ՝ համաձայն եմ, որ դա շատ վատ մենեջմենթի հետևանք է, որովհետև բոլոր այդ ընկերոթյունները, որոնք դրսից են Հայաստանում, միայն աշխատում են հնարավորինս շատ շահույթ կորզելու համար: Ես այն կարծիքին եմ` եթե ղեկավարությունը հայրենական լինի, գոնե մի քիչ խղճով կլինի, պարզ է՝ դրսի կապիտալիստները այստեղ ո՞նց պիտի աշխատեն:
-Մի հարց էլ` ընտրությունների հետ կապված: Երբ Ծառուկյանի դեմ պայքարում էր ՀՀԿ-ն, ասում էին՝ թույլ չեն տալու, որ ֆեոդալիզմը արմատներ գցի այս երկրում, միաժամանակ տեսնում ենք՝ ինչպես է զարգանում նույնն Արարատի մարզում, Արտաշատի քաղաքապետի ընտրություններում առաջադրվել է գործող վարչապետի որդին, որին սատարում է Հանրապետական կուսակցությունը, այս երևույթը ինչպե՞ս կգնահատեք:
-Ես չգիտեմ՝ որ համակարգից են խոսում հանրապետականները, բայց նրանք մի հոգի չեն, տասնյակ հազարավորներ են, մենք ֆեոդալիզմի դարաշրջանում չենք ապրում, հաստատ ես կարող եմ վկայել, այնպես որ նմանատիպ որակումներ պետք չէ տալ: Ապրում ենք բավականին զարգացած կապիտալիզմի պայմաններում և՝ թոթափենք ֆեոդալական կարգերը, ստրկատիրությունը մտցնենք.. ես այդ ձևակերպումների հետ համաձայն չեմ: Ինչ վերաբերում է վարչապետի որդուն, կարծես թե բարձրաստիճան պաշտոնյաների երեխաները, ուստրերն ու դուստրերը մի տեսակ իրավունք չունեն մասնակցելու հանրային կյանքին: Դա սկսվեց երջանկահիշատակ վարչապետի որդուց՝ Տարոն Մարգարյանից.. Գիտեք ինչ, ես հիշում եմ, թե ինչպիսի որակումներ էին տալիս այն ժամանակ և հիշում եմ հիմա՝ ինչ որակումներ են տալիս նրա աշխատանքին, ուստի պետք չի, որ մենք անմիջապես բաներ փնտրենք ու ասենք…
-Դուք նշում եք՝ «պաշտոնյաների ուստրերն ու դուստրերն իրավունք չունե՞ն», ունեն, բայց երբ իշխանական ռեսուրսը ընտրում է նրանց ուստրերի ու դուստրերի, գործող վարչապետի որդու պաշտպանությունը, ոչ թե մյուս թեկնածուների, որքանո՞վ է դա արդար:
-Գործող վարչապետի որդին ՀՀԿ-ի փոխնախագահի որդին է, և, բնականաբար, լինելով անկուսակցական իր ամբողջ գործունեության ընթացքում ապացուցել է, որ հարում է Հանրապետական կուսակցությանը և բազմաթիվ փորձություններով անցնելու ժամանակ Հանրապետականը տեսնում է՝ իր կողքին ովքեր են կանգնած: Էսօր ՀՀԿ-ի կողքին այնպիսի ուժեր են կանգնած՝ կուսակցական ու անկուսակցական, որ ինձ համար զարմանալի է, իսկ Արգամ Աբրահամյանի մասով շատ տեղին որոշում է կայացրել Հանրապետական կուսակցությունը:
–Այսինքն, Դուք ողջունո՞ւմ եք, որ վարչական լծակներն օգտագործում են՝ ի նպաստ ընտանիքի անդամների առաջընթացի:
-Ես ոչ թե ողջունում եմ, այլ անհատի իրավունքները հարգում եմ՝ անկախ ամեն ինչից: Հիմի որ իմ երեխաները բարձր պաշտոներ չեն զբաղեցնում, ինձ գովու՞մ եք դրա համար: Անձամբ ես դժգոհ եմ, ես կուզենայի, որ իմ երեխաները ևս հանրային կյանքում իրենց տեղը գտնեին:
–Ինչ է, Դուք չե՞ք նպաստում:
-Ի վերջո, հերիք է, էլի, էդ պաշտոնյաների երեխաների պրոբլեմը դարձնեք հասարակական քննարկման առարկա… Բազմաթիվ պաշտոնյաներ կան, որոնց ծնողները սովորական մարդիկ են, մեկ-երկու հոգի էլ պաշտոնյաների երեխաներ են, որոնց անմիջապես սկսում եք քննադատել:
– Եթե Դուք նշված պաշտոնյաների որդիների որակներն այդպես բարձր եք գնահատում, այդ դեպքում՝ ինչու՞ է նրանց պաշտպանում ՀՀԿ-ն, թողեք փորձեն ինքնուրույն առաջ գնալ:
-Այնպիսի հարց եք առաջ քաշում, որ ես ժամերով պիտի բացատրեմ՝ ինչու: Ասեցի՝ լինելով անկուսակցական մարդիկ, ՀՀԿ-ի համար ինչ որ ձևով աշխատել են ընտրությունների մասնակցել և այլն, և այլն.. ինչի չեք զարմանում, որ հիմի ՀՀԿ-կողքին կանգնած են կուսակցություններ ու անհատներ, ովքեր դաժան ճակատամարտեր էին մղում երկար ժամանակ:
-Ովքե՞ր:
– Չգիտեմ, Դուք ասեք, Արգամի տեղը գիտեք, իրենցը՝ չէ՞:
– Ի՞նչ ճակատամարտեր նկատի ունեք:
-Այսինքն, մեր հետ համաձայն չէին, մեր դեմ պայքարում էին, ընդդիմություն էին, ուզում եմ ասեմ, որ ամեն ինչ հնարավոր է:
– ԲՀԿ-ի՞ն նկատի ունեք:
-Չգիտեմ, ԲՀԿ-ՀՀԿ է, դուք բոլոր փաստերը գիտեք, էդ մեկը չգիտե՞ք:
-Պարոն Հարությունյան, Ձեր նշած ուստրերն ու դուստրերը սեփական ուժերով, առանց բարձր աջակցության կարո՞ղ են բաժնի պետի պաշտոնի հասնել:
-Հովիկ Աբրահամյանը իր ամբողջ գործունեության ընթացքում ոչ մի հովանավորություն չի ունեցել, նրա ծնողները շատ հասարակ մարդիկ էին, գյուղացի մարդիկ, որոնց բախտ եմ ունեցել ճանաչելու, բայց տեսնում եք՝ սովետական տարիներից սկսած մարդը հասել է վարչապետի պաշտոնին. ո՞վ է աջակցել, Արգամ պապի՞կը, ոչ: Կան մարդիկ, ովքեր ի ծնե, ի բնե ունեն էդ ընդունակություններն ու առաջ են գնում: Ես չեմ վախենում, որ Դուք կքննադատեք, որ իմ գործընկերոջը պաշտպանում եմ, երդվում եմ՝ չեմ պաշտպանում… Ես վախենում եմ, էլի իմ որդուն որևէ տեղ միջնորդել:
-Ինչո՞ւ չեք միջնորդում:
-Նա բարձր պաշտոն էր զբաղեցնում` հարկայինի պետի տեղակալ էր, դիմում է տվել, ազատվել է առողջական խնդիրրների պատճառով: Ես անգամ եթե իշխանության մեջ չլինեմ, երբ հարցը երեխաներին է վերաբերվում, թուլություն ունեմ ու ուզում եմ՝ առաջ գնան:
-Իսկ ի՞նչ պիտի անեն այն երեխաները, ովքեր հովանավորներ չունեն, բայց խելք ունեն:
-Աժ-ում բարձր պաշտոններ են զբաղեցնում երիտասարդ մարդիկ, որոնք ոչ մի հովանավորչություն չեն ունեցել: Հանրապետականն իր դարբնոցում կռել է էդ մարդկանց և հիմի տեսեք՝ ինչ հիանալի երիտասարդներ են:
–Սուրիկ Խաչատրյանի որդին է՞լ է այդ դարբնոցից:
-Ես չեմ կարծում, որ Սուրիկ Խաչատրյանի որդին հանրապետական է և ընդհանրապես, այդ հարցերը ուղղեք Սուրիկ Խաչատրյանին: Ես պատասխաանտու եմ իմ երեխաների համար, ես ուրախանում եմ լավ սերունդով և տխրում, որ Սուրիկ Խաչատրյանի որդին հնարավորություն է տվել, որ էդ հարցը ինձ տաք:
-Արդյոք անպատժելիության հետևանք չէ՞, երբ նույն մարդիկ պարբերաբար այս կամ այն հանցագործության մասնակից են:
-Պատժիչ օրգանին դիմեք, ես հերիք է սրա-նրա տեղը պատասխան տամ, ես հազիվ եմ իմ տեղը կարողանում պատասխան տալ, ես հոգնել եմ էդ պաշտպանությունից, դրա համար կա դատախազ քննչական կոմիտե, իրենցից հարցրեք՝ ինչու չեն պատժում:
