Գերմանիան Հունաստանին առաջարկում է պարտքի հարցը լուծել հանրաքվեով

Գերմանիայի ֆինանսների նախարար Վոլֆգանգ Շոյբլեն հունական իշխանություններին առաջարկում է անհրաժեշտ բարեփոխումների հարցերով հանրաքվե անցկացնել՝ վարկատուների հետ տարաձայնությունները լուծելու համար։ Այս մասին գրում է Die Welt-ը։

Բրյուսելում Եվրոխմբի հանդիպման կուլիսներում Շոյբլեն այդ գաղափարն անվանել է «հնարավոր և պատշաճ միջոցառում», որը հույն ժողովրդին թույլ կտա ինքնուրույն վճռել իր ճակատագիրը։

Հունաստանի վարկատուների եռյակը՝ ԵՄ-ն, ԵԿԲ-ն և ԱՄՀ-ն, Հունաստանից պահանջում են տնտեսական կոշտ միջոցառումներ սահմանել, որոնց նոր իշխանությունները վարչապետ Ալեքսիս Ցիպրասի գլխավորությամբ պատրաստ չեն գնալ։

Պարբերականը նշում է, որ հանրաքվեի անցկացման գաղափարը ավելի ու ավելի շատ կողմնակիցներ է գտնում ԵՄ-ի ներսում։ Ընդ որում, շատերը կարծում են, որ հանրաքվեի պետք է դրվի եվրոգոտում Հունաստանի պահպանման հարցը։