Մուհամեդ մարգարեի ծաղրանկարների հեղինակ, շվեդ Լարս Վիլքսը պատրաստում է նոր ցուցահանդես Մալմյո քաղաքի մասնավոր պատկերասրահում: Ինչպես հաղորդում է ITAR-TASS-ը, ցուցահանդեսը բացվելու է 2013 թ. ամռանը:
2007 թ. Վիլքսը ստեղծել էր քանդակներ ճանապարհային հանգույցի համար, որտեղ նա շանը պատկերել էր Մուհամեդ մարգարեի գլխով: Լուսանկարը հրապարակվել էր Nerikes Allehanda շվեդական թերթում, ինչը բողոքի մեծ ալիք էր բարձրացրել: Որոշ տվյալներով՝ Ալ-Քաիդան Վիլքսի գլուխը գնահատել է 100 հազար դոլար:
Նախատեսվող ցուցահանդեսին ներկայացվելու են ճանապարհային հանգույցի համար շներով նկարներ և մարգարեի պատկերը: Վիլքսն արդեն հանդիպում է ունեցել ոստիկանության ներկայացուցիչների հետ, որի ժամանակ քննարկվել է պատկերասրահի անվտանգության խնդիրները: Պատկերասրահի սեփականատերը ցուցահանդեսի մեջ ոչ մի սադրիչ բան չի տեսնում, քանի որ, նրա կարծիքով, դրանում չկան կրոնական կամ քաղաքական նկատառումներ:
Ծաղրանկարների հրապարակվելուց հետո Վիլքսն ապրում է ոստիկանության հսկողության ներքո: