Չեմպիոնների լիգայի քառորդ եզրափակիչ «Շախտյոր»-«Բարսելոնա» հանդիպումից հետո «հանքափորներ»-ի հենակետային կիսապաշտպան Հենրիկ Մխիթարյանը պատասխանել է լրագրողների հարցերին:
– Անկախ առաջին խաղում կրած 5:1 հաշվով պարտությունից՝ մենք ցանկանում էինք հաղթել և ուրախացնել մեր երկրպագուներին: Նման խաղերը շատ չեն, և մենք ամեն ինչ անում ենք նրանց ուրախացնելու համար: Ցավոք, այս խաղում մեզ չհաջողվեց դա անել: Մենք ոչ մի ջանք չխնայեցինք, սակայն առաջին խաղակեսի վերջում գնդակ բաց թողեցինք և այդպես էլ չկարողացանք իրավիճակը շտկել:
– Նման հանդիպումներից հետո ի՞նչ հոգեվիճակում է լինում «Շախտյոր»-ը։
– Հաջորդ անգամ հարկավոր է ավելի սառնասիրտ գտնվել և համապատասխան եզրակացություններ անել: Մենք երիտասարդ թիմ ունենք և ի վիճակի ենք ուղղել մեր սխալները. բոլորը ձգտում են սովորել ու ավելիին հասնել:
– «Շախտյոր»-ն ավարտեց իր մրցելույթները Չեմպիոնների լիգայի ընթացիկ խաղարկությունում: Ի՞նչ դաս քաղեցիք այս ամենից:
– Ինքս ինձ համար բացահայտեցի, որ այստեղ բոլորովին այլ մակարդակ է, որը չի կարելի համեմատել Ուկրաինայի առաջնության հետ: Այստեղ խաղում են ուժեղագույն ակումբները, և առաջ են գնում միայն ավելի համբերատարներն ու ուժեղները:
