Չինաստան կատարելիք այցի նախօրեին Ռուսաստանի Դաշնության նախագահ Դմիտրի Մեդվեդևը հարցազրույց է տվել չին լրագրողին, որտեղ մի շարք ուշագրավ հայտարարություններ է արել:
Մեդվեդևը չի բացառել, որ կառաջադրվի 2012 թ. նախագահական ընտրությունների ժամանակ, ինչի մասին ամենամոտ ապագայում խոստացել է հայտարարել: «Ապագան ոչ ոք, իհարկե, չգիտի, սակայն կարող եմ ասել, որ ես, որպես նախագահ, որպես երկրի գործող ղեկավար, իհարկե, դրա մասին մտածում եմ, ես ուղղակի պարտավորեմ դա անել»,- ասել է Մեդվեդևը: «Որոշումը կընդունվի, ընդ որում՝ ամենամոտ ապագայում, քանի որ արդեն մնացել է մեկ տարուց էլ պակաս ժամանակ: Սակայն այդ որոշումը նախ և առաջ պետք է հասուն լինի, և երկրորդը` այն պետք է հիմնված լինի ներկա սոցիալական իրավիճակի, գոյություն ունեցող քաղաքական նախապատվությունների դասավորության և, որ ամենակարևորն է, մարդկանց վերաբերմունքի վրա»,- նշել է Մեդվեդևը:
Մեդվեդևն առաջին անգամ նշել է երկրի զարգացման ուղիների վերաբերյալ իր և վարչապետ Պուտինի դիրքորոշումների տարբերության մասին. «Ես վստահ եմ, որ մեր խնդիրը մեկն է` որպեսզի տասը-քսան տարի հետո Ռուսաստանը լինի աշխարհի ամենաուժեղ, հզոր պետություններից մեկը… Պարզապես մենք տարբեր կերպ ենք նայում այն մեթոդներին և միջոցներին, որոնցով պիտի հասնենք այդ բարգավաճմանը: Սակայն դա հենց ժողովրդավարությունն է, դա հենց մրցակցությունն է: Ահա, ես ունեմ մի դիրքորոշում, ինչ-որ մեկինը կարող է մի փոքր այլ լինել: Եվ միայն փոխհարստացումը կարող է արդյունք տալ»,- ասել է նախագահը: «Իմ նպատակը տնտեսական և քաղաքական կյանքի արդիականացումն է: Մենք չպետք է հրաժարվենք այն ամեն լավից, ինչ արել ենք, ասենք, վերջին 20 և, հատկապես, վերջին 10 տարիների ընթացքում, սակայն մենք պետք է առաջ նայենք»,- ավելացրել է նա:
Վարչապետ Վլադիմիր Պուտինը, որը գտնվում էր Կիևում, այս հարցազրույցից հետո անսպասելիորեն չեղյալ է հայտարարել շփումը մամուլի հետ, որը նախատեսված էր ծրագրով: Իսկ նրա խոսնակ Դմիտրի Պեսկովը հայտարարել է, թե իրենք դեռ չեն հասցրել ծանոթանալ նախագահի հայտարարություններին: