Աբովյանի 28/12 ընտրատեղամասում ընտրողները «Առաջին լրատվական»-ի թղթակցին զարմացած պատմել են, որ ՀՀԿ անդամները մեքենաներով ընտրողներ են բերում ընտրատեղամաս և հրահանգում են ընտրել «Ժառանգության» թեկնածու Րաֆֆի Հովհաննիսյանին: Ընտրողները նշել են, որ իրենց թվում էր, թե Սերժ Սարգսյանին կընտրեին, բայց իրենց ասել են, որ ընտրեն քվեաթերթիկի 3-րդ համարին, այսինքն՝ Րաֆֆիին:
Նույն ընտրատեղամասում հանձնաժողովի «Ժառանգության» անդամ Էմմա Տորոզյանն ասաց, որ ինքը տեղյակ չէ և չի կարող բացատրել՝ ինչու է այդպես: Սակայն նա էլ հավելեց, որ, իր տեղեկություններով, ԲՀԿ-ն իր անդամներին ներքին կարոգվ հրահանգել է աշխատել և ընտրել գործող նախագահ Սերժ Սարգսյանի օգտին: Նա ասել է, որ երեկ երեկոյան իրենց տուն են գնացել ինչ-որ մարդիկ և հորդորել են հրաժարվել «Ժառանգություն»-ից և աշխատել Սերժ Սարգսյանի օգտին, բայց ինքը հրաժարվել է:
Նա նույնպես լսել է, որ Աբովյանի քաղաքապետ, ԲՀԿ անդամ և Գագիկ Ծառուկյանի փեսա Կարեն Գուլոյանը քաղաքի վարչական պատասխանատուներին, պետական և մասնավոր աշխատողներին հրահանգել է Սերժ Սարգսյանի համար ձայներ բերել, իսկ նույն հանձնաժողովի նախագահ Կարինե Պապյանը, որը ԲՀԿ անդամ էր, ասաց, որ նման հրահանգ չկա, բայց, իր տեղեկություններով, ԲՀԿ անդամների մեծ մասը ընտրում են Սերժ Սարգսյանին:
