Հայտնի սկանդալային բրիտանացի իսլամիստ Անհեմ Քուդարին կրկին հարուցել է հանրության վրդովմունքը՝ իր հավատքին հարողներին կոչ անելով ապրել հարկատուների գումարներով: Այս մասին հայտնում է The Sun-ը:
Նա հիշեցրել է, որ Բրյուսելի բնակչության 30 տոկոսը կազմում են մուսուլմանները, Ամստերդամում նրանց թիվը հասնում է 40 տոկոսի, իսկ Բրեդֆորդում՝ 17 տոկոսի: Նա իրենց ծնելիությունը համեմատել է ցունամիի հետ, որը ծածկում է Եվրոպան:
Իմամի խոսքով՝ «անհավատները» պարտավոր են գումար տալ հավատացյալներին և այդպիսով ֆինանսավորել իրենց իսկ դեմ ուղղված պատերազմը: Նա ստրուկներ է անվանել աշխատող համաքաղաքացիներին:
Քուդարին հայտնել է, որ վաղ թե ուշ իսլամը կծածկի ողջ Եվրոպան: Մեծ Բրիտանիայի վարչապետ Դևիդ Քեմերոնը, ԱՄՆ նախագահն ու Եգիպտոսի և Պակիստանի առաջնորդները կսպանվեն: Նա թագուհի Էլիզաբեթ II-ին անճոռնի է անվանել:
Պարբերականը նշում է, որ նախկին փաստաբան Քուդարին, որը 4 երեխաների հայր է, որպես նպաստ ստանում է տարեկան 25 հազար ֆունտ և բնակվում է 320 հազար ֆունտ արժողությամբ տանը:
Նա գլխավորում է «Ալ-Մուջահրուն» խմբավորումը, որը կազմակերպում է հակաարևմտյան ցույցեր: