«Դե, երկու շաբաթում ինչ պետք ա լիներ՝ Անդրիասը կմահանար, թեկնածուներն էլ քարոզարշավ կանցկացնեին». Հայրիկյան

Բոլոր թեկնածուներն իրենց պահվածքով ցույց են տվել, որ իրենք կողմ են այս գնդակահարությանը: Այսօր լրագրողների հետ հանդիպման ընթացքում ասաց նախագահի թեկնածու, ԱԻՄ առաջնորդ Պարույր Հայրիկյանը. «Սկզբում զորակցություն հայտնեցին, հետո մեկը քարոզարշավը մի օրով հետաձգեց, մյուսները դա էլ չարեցին, հետո կանգնեցին ասացին, թե ես եմ դա կազմակերպել, դա ստորություն է, եթե ուրիշի դեմ ուղղված լիներ մահափորձը, ես հաստատ կդադարեցնեի իմ քարոզարշավը»:

Դիտարկմանը, թե ինչո՞ւ, այնուամենայնիվ, Սահմանադրական դատարան դիմելուց հետո հետ վերցրեց իր դիմումը, Հայրիկյանն ասաց. «Այդ երկու շաբաթում, դե, ինչ կլիներ՝ Անդրիասը կմահանար, իսկ մնացած թեկնածուներն էլ հնարավորություն կունենային լավ քարոզարշավ իրականացնել»:

Պարույր Հայրիկյանն ասաց, որ ինքը, Հրանտ Բագրատյանն ու Րաֆֆի Հովհաննիսյանը կարող էին միավորվել և 100 տոկոսանոց հաղթանակ գրանցել, բայց նրանք տրամաբանությամբ առաջնորդվեցին, և այդ էջը ինքը փակված է համարում:

Այն հարցին, թե առանձին-առանձին ընտրությունների գնալը արդյոք նշանակո՞ւմ է պարտություն, ԱԻՄ առաջնորդն ասաց. «Պարտություն չի նշանակում, պարզապես 100 տոկոսանոց հաղթանակ չի լինի, իշխանությունն իր լծակները կօգտագործի էլի և այլն»:

Լուսանկարը՝ PanARMENIAN Photo-ի