Ուրբաթ օրը Չիկագոյի դպրոցներից մեկն այցելելիս, որտեղ մեկ ամիս առաջ սպանվել էր 15-ամյա Հադիա Պենդլթոնը, ԱՄՆ նախագահ Բարաք Օբաման կրկին կոչ է արել երկրում հրազենի հարցում խիստ հսկողություն սահմանել:
Օբամայի խոսքով՝ զինված բռնությունը չափազանց շատ երեխաների կյանք է խլում, և ոչ միայն զանգվածային հրաձգությունների ժամանակ: Նա հիշեցրել է, որ անցյալ ամբողջ տարվա ընթացքում միայն Չիկագոյում սպանվել է 65 երեխա:
Օբաման հայտնել է, որ իր վարչությունը հրազենի վերահսկողության միջոցառումների փաթեթ է մշակել, այդ թվում՝ կիսաավտոմատ զենք կրելու և պահելու արգելք, փամփուշտների թվի սահմանափակում՝ փոխանցում է ITAR-TASS-ը: Նախագահը Կոնգրեսին կոչ է արել ընդունել այդ հարցին առնչվող փաթեթը:
«Սա պարզապես զենքի մասին հարց չէ, հարցը այն հասարակության մասին է, որը մենք կառուցում ենք: Եվ մեր քաղաքացիական պարտքն է այն ավելի լավը դարձնել»,- նշել է Օբաման:
