Սիրիայում շարունակվում է պատերազմը, դաժան մարտեր են ընթանում հատկապես Հալեպի օդանավակայանի շրջանում: Ուրբաթ օրն ընդդիմության ներկայացուցիչները հայտնել են, որ մարտերը շարունակվում են արդեն 3 օր, երկու կողմից զոհվել է առնվազն 150 մարդ:
Սիրիական SANA տեղեկատվական գործակության փոխանցմամբ՝ Ալ-Իզաա և Սեյֆ Ադ-Դոուլ թաղամասերի բնակիչները զանգվածային ցույց են կազմակերպել՝ ի պաշտպանություն Սիրիական ազգային բանակի:
Սիրիայի իշխանությունների պաշտոնական տվյալներով՝ զինյալների դեմ պայքար է ընթացել Հալեպի մի քանի թաղամասերում: Հայտնում են, որ ընդդիմադիրների կորուստները հաշվվում են տասնյակներով, շատ զենք է գրավվել կամ ոչնչացվել: SANA-ն տեղեկացնում է Իդլիբ, Դամասկոս և Հոմս նահանգներում կառավարական ուժերի հաջող գործողությունների մասին:
Փետրվարի 15-ին թուրքական հրետանին հարվածել է սահմանամերձ տարածքի տեղամասերից մեկը: Տուժածներ և ավերածություններ չկան: ITAR-TASS-ը նշում է, որ հայտնի չէ՝ մի կրակոցը արձակել են Սիրիայի զորքե՞րը, թե՞ ընդդիմադիրները, որոնք մարտնչում են Թուրքիայի հետ սահմանին:
Այս ֆոնին Անկարան ու Դամասկոսը նորից մեղադրանքներ են փոխանակել: Թուրքիայի ԱԳՆ ղեկավար Ահմեդ Դավութօղլուն քննադատել է Սիրիայի հարցում միջազգային հանրության դիրքորոշումը:
«Անհրաժեշտ է արձագանքել նրանց գործողություններին, ովքեր ռազմական հանցանքներ են գործում: Մենք դեռ սպասում ենք հանրությանն ուղղված մեր կոչի արձագանքներին: Սիրիայում 70 000 մարդ է զոհվել, միլիոնավորները սոված են: Ե՞րբ ՄԱԿ-ը միջոցներ կձեռնարկի: Ինչո՞ւ են միայն Թուրքիան և Սիրիայի հարևան պետությունները վճարում այս ամենի համար:
Պետք է, որպեսզի օգնությունը հասանելի լինի ամենուր՝ և վարչակարգի, և ընդդիմության ղեկավարության տակ գտնվող շրջաններում: Այդ որոշումը պետք է պատժամիջոցներ սահմանի նրանց դեմ, ովքեր խանգարում են կարիքավորներին օգնություն ցուցաբերել»,- ասել է նախարարը:
Սիրիայի ԱԳՆ-ի իր հերթին հայտարարել է, որ Թուրքիայի կառավարությունը «ապակառուցողական և քայքայիչ դեր է խաղում սիրիական ճգնաժամի հարցում»:
Սիրիայի ԱԳՆ ղեկավարի տեղակալ Ֆեյսալ Մեքդադի խոսքով՝ սիրիական կառավարությունը «պատրաստ է առանց նախապայմանների բանակցությունների սեղանի շուրջ նստել ընդդիմության հետ»:
