ԱՄՆ-ը շարունակում է Ռուսաստանի հետ Սիրիայում տիրող իրավիճակի շուրջ բանակցել մի քանի ուղղություններով՝ հայտարարել է ԱՄՆ պետդեպարտամենտի պաշտոնական ներկայացուցիչ Վիկտորյա Նուլանդը: Այս մասին հայտնում է RIA Novosti-ն:
«Մենք շարունակում ենք բանակցությունները ռուսների հետ: Առաջին հերթին այն մասին, որ դադարեցնեն Ասադի վարչակարգին ռազմական և տնտեսական աջակցություն ցուցաբերել, նաև այն մասին, որ նրանք միանան մեզ՝ սատարելու այն հարցում, ինչ առաջարկեց ալ-Խաթիբը (Սիրիայի միասնական ընդդիմության ղեկավար)՝ վարչակարգի ներկայացուցիչների հետ իշխանության փոխանցման վերաբերյալ երկխոսելու հարցում»,- ասել է Նուլանդը:
Նուլանդը մեկնաբանելով սիրիական ընդդիմության ղեկավարի և Սիրիայի ԱԳՆ ղեկավարի՝ Մոսկվա այցելելուց հրաժարվելու հարցը, նշել է, որ ԱՄՆ-ը այնքան էլ չի հասկանում՝ ՌԴ-ն իսկապե՞ս հույս ուներ, որ նման բանակցությունները հաջողությամբ կավարտվեն:
Նուլանդը նաև նշել է, որ ԱՄՆ-ի և Ռուսաստանի միջև պահպանվում է բանակցությունների համար կարևոր ալիք, այսպես ասած «երեք Բ»-երի՝ Սիրիայի հարցով ՄԱԿ-ի և ԱՊԼ հատուկ բանագնաց Լախդար Բրահիմիի և ԱՄՆ ու ՌԴ ԱԳՆ ղեկավարների տեղակալներ Ուիլյամ Բերնսի ու Միխայիլ Բոգդանովի հանդիպումը:
Սիրիայում զինված հակամարտությունը ընդդիմության և կառավարական զորքերի միջև շարունակվում է 2011-ի մարտից: ՄԱԿ-ի տվյալներով՝ երկրում բռնության զոհ է դարձել ավելի քան 70 000 մարդ:
