«Հրապարակն» այսօր դառնում է հինգ տարեկան: Թերթը խմբագրականում գրում է. «Շա՞տ է, թե՞ քիչ թերթի համար: Եթե թվարկենք այն բոլոր փորձություններն ու դժվարությունները, որոնց միջով ստիպված ենք եղել անցնել այս հինգ տարիների ընթացքում, դրանք թերևս 50-ամյա լրատվամիջոցի կյանքին անգամ կբավարարեին: Սակայն կարծես երեկ էր, որ սկսեցինք առաջին քայլերն անել մամուլի «ականապատ» դաշտում:
Դժվարությամբ, բայց քայլ-քայլ հաղթահարեցինք նորաստեղծ լրատվամիջոցների առջև հառնող բոլոր խոչընդոտները: Անցանք հրի ու սրի` դատական պրոցեսների, ճնշումների, մերժման, անհանդուրժողականության միջով, արտակարգ դրություն տեսանք, դատական պրոցեսներ լուսաբանեցինք, քաղաքական բախումների մասնակցեցինք: Բուռն քաղաքական գործընթացների ականատեսն ու արձանագրողը եղանք: Աշխատեցինք դրանց նայել կողքից և որքան հնարավոր է` անաչառ ներկայացնել դեպքերն ու դեմքերին: Փորձեցինք հասարակության «աչքը» լինել` սրատես ու քննադատող: Նրա խոսնակը` սուր հարցադրումներով իշխանավորներին նեղող:
5 տարի առաջ փետրվարի 16-ին` 2008-ի նախագահական ընտրություններից երկու օր առաջ, մենք լույս աշխարհ եկանք և միանգամից հայտնվեցինք հանրահավաքների, քաղաքական պայքարի թեժ մթնոլորտում: Հինգ տարի անց մենք կրկին նախագահական ընտրությունների բովում ենք: Եվ կրկին երկու օր անց մեզ համապետական նշանակության ընտրություններ են սպասվում: Իրավիճակն անշուշտ տարբերվում է 2008-ից, բայց միևնույն է` սա երկրի համար ամենաբարդ ստուգատեսն է, և մենք կրկին կանգնած ենք դրանից պատվով դուրս գալու խնդրի առաջ: Ի՞նչ տրամադրությամբ ենք արթնանալու փետրվարի 19-ին: Կրկին անիծելո՞ւ ենք ընտրություն կոչվող գործընթացը, անզորությունից ատա՞մ ենք կրճտացնելու, թե՞ հենց այդ օրվանից սկսելու ենք սպասել հաջորդ ընտրություններին»: