Մոլդովայի կառավարության շենքում կատարվում են խուզարկություններ, քանի որ որոշ նախարարներ կասկածվում են կոռուպցիայի մեջ: Այդ մասին հայտնել է հակակոռուպցիոն կենտրոնի մամուլի խոսնակ Անժելա Ստարինսկին:
Նա հայտարարել է, որ խուզարկությունները կատարվում են նախկինում հարուցված քրեական գործի շրջանակներում, ըստ որի՝ որոշ բարձրաստիճան պաշտոնյաներ կասկածվում են կոռուպցիայի և պաշտոնեական դիրքի չարաշահման մեջ:
Քրեական գործ է հարուցվել կրթության, առողջապահության և ֆինանսների նախարարների նկատմամբ:
Դեմոկրատների առաջնորդ, խորհրդարանի նախագահ Մարիան Լուպուն մեղադրել է վարչապետին երկիրը քաղաքական ճգնաժամի մեջ ներքաշելու համար: Նա նշել է, որ վարչապետը խորհրդարանը թողել է առանց իշխող մեծամասնության և մտերմացել է ընդդիմադիր կոմունիստական կուսակցության հետ, ովքեր ցանկանում են ցրել խորհրդարանը և արտահերթ ընտրություններ անցկացնել: Խոսնակը նշել է, որ վարչապետը վախենում է քաղաքացիներին խոստովանել ԵՄ անդամակցության հարցի ձախողման փաստը:
Մոլդովայում քաղաքական ճգնաժամը սկսվել է այն բանից հետո, երբ Նոր տարվա նախօրեին բարձրաստիճան դատախազների և դատավորների մասնակցությամբ որսի ժամանակ պատահաբար սպանվել էր գործարար Սորին Պաչուն: Ողբերգության մասին քաղաքացիները տեղեկացել էին հասարակական կազմակերպություններից: Լուրեր էին տարածվել, թե մահացու կրակոցն արձակել է երկրի գլխավոր դատախազ Վալերի Զուբկոն: Ընդդիմությունը պահանջում էր նրա հրաժարականը: Կառավարության ղեկավարն աջակցում էր այդ պահանջին:
ԶԼՄ-ներում ենթադրություններ էին հնչում, թե լիբերալ-դեմոկրատները, անհանդուրժողականություն դրսևորելով կոալիցիայի մյուս անդամների հանդեպ, փորձում են նոր դաշինք կազմել կոմունիստների հետ:
