ՀՀ նախագահի թեկնածու Պարույր Հայրիկյանի ինքնազգացողությունը երեկ կտրուկ վատացել է, նա սուր ցավեր ունի ձեռքի և վերքի շրջանում:
ԱԻՄ արտաքին կապերի պատասխանատու Կարո Եղնուկյանն «Առաջին լրատվական»-ի հետ զրույցում նշեց, որ ցավերը սկսվել են երեկ՝ քարոզարշավի ընթացքում. «Ցավերն անտանելի են, ուժեղանում են հատկապես գիշերը, այս գիշեր եկել են բժիշկները, մի քանի անգամ ներարկումներ կատարել»,- հավելեց նա:
Մարզեր նախատեսված այցերն այսօր դադարեցվել են:
«Մեր մեքենաներից մի քանիսը ճանապարհ են ընկել, բաժանում են թռուցիկներ, ձայնասկավառակներ, բայց Հայրիկյանը չի գնալու: Գյուղերը չհաշված՝ պետք է գնային Ապարան, Սպիտակ և Վանաձոր»,- ասաց Կարո Եղնուկյանը՝ հավելելով, որ երեկ քարոզարշավի շրջանակներում կատարած այցի ժամանակ՝ Աշտարակ, Մարալիկ, Արթիկ, Գյումրի, ճանապարհին Պարույր Հայրիկյանի ինքնազգացողությունը վատացել է, ինչի պատճառով Պարույր Հայրիկյանը մի քանի տեղ չի կարողացել իջնել մեքենայից:
«Երեկվանից նրա համար բժիշկները նախապատրաստել են հիվանդասենյակը, նրանք դեռ երեկ էին ասում, որ պառկի, հիմա գնում ենք հիվանդանոց, դեռ չգիտենք՝ կմնա՞ հիվանդանոցում, թե՞ ոչ»:
