Ռուսաստանի արտաքին գործերի նախարարությունը մտադիր է սպասել մինչ Վրաստանում Ռուսաստանի չորս քաղաքացիների լրտեսության մեղադրանքով ձերբակալության մասին ամբողջական տեղեկատվության հրապարակումը, հետո պաշտոնապես կմեկնաբանի այն:
Այս մասին հաղորդում են ռուսաստանյան գործակալությունները:
Վրաստանի ներքին գործերի նախարարության հակահետախուզական վարչության ղեկավարի տեղակալ Օթար Օրջոնիկիձեն ճեպազրույցում հայտարարել էր, թե հօգուտ Ռուսաստանի լրտեսության մեղադրանքով ձերբակալվել է13 մարդ, այդ թվում` Ռուսաստանի չորս քաղաքացի:
Ձերբակալված ՌԴ քաղաքացիներից երկուսը ազգությամբ հայեր են` Արմեն Գեւորգյանը, Ռուբեն Շիկոյանը: «Եկեք սպասենք, տեսնենք, ինչքանով համոզիչ կլինի այդ քաղաքական ֆարսը, որպեսզի հետո նոր մեկնաբանություններ տանք», – ասել է ՌԴ ԱԳ նախարարության ներկայացուցիչ Գրիգորի Կարասինը:
Մեկ այլ տեղեկատվության համաձայն, որը տարածել է Interfax գործակալությունը, ՌԴ արտգործնախարարության անանուն աղբյուրը նշել է, թե վրացական իշխանությունների այդ քայլը «հակառուսական պրովոկացիա է ենթադրում»: «Ակնհայտ է, որ այդ ամենն արվել է Լիսաբոնում անցկացվելիք Ռուսաստան-ՆԱՏՕ ու Աստանայում նախանշված ԵԱՀԿ գագաթնաժողովների նախաշեմին, առավելագույնս ուշադրության արժանանալու եւ Ռուսաստանին վնասելու համար», – ասել է անանուն աղբյուրը:
