Խորհրդարանում քննարկվում է ՀՀԿ-ական մի շարք պատգամավորների հեղինակած` ԱԺ կանոնակարգ-օրենքում փոփոխությունների նախագիծը: Այստեղ, թերևս, մեկ ուշագրավ առաջարկ է արվում. ԱԺ-կառավարություն հարցուպատասխանի ժամանակ հնարավորություն է տրվում կառավարությանը ԱԺ պատգամավորի բանավոր հարցին ԱԺ-ում չպատասխանել` խոստանալով պատասխանն ուղարկել գրավոր: ԱԺ անկախ պատգամավոր Վիկտոր Դալլաքյանը, ելույթ ունենալով այս նախագծի կապակցությամբ, ասաց, թե այդպես ոտնահարվում է պատգամավորի` Սահմանադրության 80-րդ հոդվածով ընձեռված, կառավարությանը հարց տալու իրավունքը: Դալլաքյանի խոսքերով, ԱԺ-կառավարություն հարցուպատասխանի ինստիտուտն օրենսդիրի կողմից գործադիրի հանդեպ վերահսկողության համար է: Իսկ եթե նման փոփոխություն մտցվի ԱԺ կանոնակարգում, Դալլաքյանի խոսքերով, կվարկաբեկվի այդ ինստիտուը: Իհարկե, Դալլաքյանն ասաց, որ փորձառու պատգամավորը այդ դրույթը գործելու դեպքում կհայտարարի ԱԺ-ում, որ տվյալ նախարարն անպատրաստ է, հետևաբար՝ իր տեղում չէ: Բայց պատգամավոին ավելի շատ մտահոգում էր փաստը, որ խորհրդարանականներից խլում են Սահմանադրության 80-րդ հոդվածով ընձեռված իրավունքը: Նա հիշեցրեց, որ այսօրվա իշխանությունը մի օր կդառնա ընդդիմություն, և հակառակը, ուստի` պետք չեն նման սահմանափակումները: Դալլաքյանի խոսքերով, օրինագծի հեղինակները պետք է վերանայեն մոտեցումը:
Այս նախագծի հեղինակներից՝ ԱԺ ՀՀԿ խմբակցության անդամ Հովհաննես Սահակյանն իր ելույթում ասաց, թե պատգամավորին ամենևին էլ չեն զրկում այդ իրավունքից, և եթե կառավարությունը հրաժարվի բանավոր պատասխանելուց, պատգամավորը կարող է այն կրկին հնչեցնել: