Հալեպի հայ համայնքի վիճակը նույնն է, ինչ քաղաքի ընդհանուր բնակչության վիճակը՝ կա տնտեսական տագնապ, վնասված բնակարաններ, քարուքանդ գործատեղիներ, և որ ամենակարևորն է՝ երկրում ստեղծված այս պայմաններում մշակութային գործունեություն ծավալելն անհնարին է: «Առաջին լրատվական»-ի հետ զրույցում այս մասին ասաց Բերիո Հայոց թեմի առաջնորդարանի բանբեր Ժիրայր Ռայիսյանն՝ անդրադառնալով Հալեպի հայ համայնքի կարիքներին:
Նա նշեց, որ դրականն այն է, որ Հալեպի բոլոր հայկական դպրոցներն՝ ազգային, միութենական, համայնքային, գործում են: «Անշուշտ, ներկա ուսուցչական կազմերը նույնն են և աշակերտության թիվը, որոնք այստեղ են, քաղաքից դուրս չեն, նրանք արդեն իսկ իրենց դպրոցները հաճախում են: Ուսուցիչների աշխատավարձերն ազգային իշխանությունն առայժմ կիսով չափ է վճարում՝ հետագայում աշխատավարձերի մյուս մասն ամբողջացնելու հանձնառությամբ: Տնտեսական խնդիրների պատճառով է, որ այսօր հնարավոր չէ այս մարդկանց վճարել ամբողջությամբ, բայց հետագայում աշխատավարձերը կամբողջացվեն»,- նշեց Ժիրայր Ռայիսյանը:
Անդրադառնալով Հալեպի հայ առաքելական եկեղեցիներին՝ նա ասաց, որ դրանցից որոշները, որոնք քաղաքի հանգիստ հատվածներում են, գործում են: «Հայաշատ Վիլլաներ թաղամասում գործում է Սուրբ Աստվածածին եկեղեցին, Սուրբ Գրիգոր Լուսավորիչ եկեղեցին է նաև գործում, իսկ Սուրբ Քառասնից Մանկանց Մայր Եկեղեցին, որը քաղաքի բախումների տաք շրջաններում է, չի գործում, որովհետև ժողովրդին ձեռնտու չէ այդ եկեղեցի հաճախելը: Նոր Գյուղ թաղամասի ծայրամասում գտնվող Սուրբ Գևորգ եկեղեցին հրկիզվել էր, նորոգման կարիք ուներ, այդ մասին ավելի վաղ տեղեկություններ տարածվեցին, այսօր այդ նորոգումը հնարավոր չէ, որովհետև այդ շրջանում գրեթե բնակչություն չկա, որովհետև զինվորական շրջան է, մինչև վիճակը չկայունանա, այդ թաղամասում ճիշտ չէ վերանորոգելն այդ եկեղեցին: Սուրբ Հակոբ եկեղեցին ևս անհրաժեշտության դեպքում օգտագործվում է»,- ներկայացրեց Ժիրայր Ռայիսյանը՝ հավելելով, որ այն քաղաքներում, թաղամասերում, որտեղ խնդիրներ չկան, եկեցիները գործում են:
Խոսելով «Օգնիր եղբորդ» նախաձեռնությունից՝ նա ասաց, որ բոլոր օժանդակություններն, անկասկած, իրենց օգտակարությունն ունենում են և օգտագործվում են այնպես, ինչպես ակնկալվում էր: Սակայն, ըստ նրա, կարիքներն այնքան մեծ են և այնքան շատ, որ այս ամբողջ օժանդակությունները փոքր մաս են կազմում ընդհանուր անհրաժեշտության մեջ: Ժ. Ռայիսյանի խոսքերով՝ աղետյալ քաղաք է Հալեպն այսօր և, անկասկած, բավականին ժամանակ է անհրաժեշտ մինչև գաղութը, քաղաքն իրենց վերագտնեն:
Հարցին, թե ինչ տեղեկություններ ունի «Հայաստան» համահայկական հիմնադրամի հանգանակած գումարից, որի մի մասը պետք է հատկացվեր սիրիահայերին, Ժ. Ռայիսյանը պատասխանեց. «Այդ մասին տեղեկություն չունեմ, եթե, բնականաբար, փոխանցված լիներ, ես տեղեկացված կլինեի»։
