Դիվանագետ Ցվի Մագենի կարծիքով՝ Կրեմլում զինվորականների տեղափոխությունները մատնանշում են կառավարության փոփոխություն: Այս մասին Il Giornale թերթում գրում է Անջելո Սկարանոն:
Պուտինը հանրության առաջ չի երևում մարտի 5-ից: Հեղինակավոր աղբյուրները հայտարարում են, որ արտառոց ոչինչ չի կատարվում, բայց շշուկները, այնուամենայնիվ, տարածվում են: Իսրայելում խոսում են պետական հեղաշրջման մասին, որը կարող է հանգեցնել Պուտինի պաշտոնանկման՝ հաղորդում է թղթակիցը:
Ռուսաստանում Իսրայելի նախկին դեսպան Ցվի Մագենի խոսքով՝ ինքը «պետական հեղաշրջման շատ նշաններ» է տեսնում: «Կրեմլի շուրջը զինվորականների շարժը մատնանշում է այն, որ տեղի է ունեցել ղեկավարության փոփոխություն կամ առնվազն ներկայիս ղեկավարին փոխելու փորձ»: Իսրայելցի դիվանագետը ենթադրում է, որ հեղաշրջումը կարող էր կատարվել «բանակում հակառակորդ խմբավորումների կամ ազդեցիկ ձեռնարկատերերի կողմից»:
Ցվի Մագենի խոսքերը հաստատել կամ հերքել հնարավոր չէ՝ գրում է հոդվածի հեղինակն ու ևս մեկ տարբերակ առաջարկում՝ Պուտինն այլևս չի կարողանա երևալ հանրության առջև, քանի որ «նա մեջքի հետ կապված խնդիրներ ունի»:
Ավստրիական Kurier թերթի տեղեկությամբ՝ Վիեննայից օրթոպեդ է ժամանել Մոսկվա Պուտինին բուժելու:
