Ադրբեջանի փոխարտգործնախարար Արազ Ազիմովն այսօր ճեպազրույցի ընթացքում անդրադարձել է Ստեփանակերտի օդանավակայանի վերագործարկման խնդրին` ասելով, թե «Ադրբեջանը չի թույլատրի իր տարածքում ապօրինի թռիչքներ»։
Նա ասել է, որ Ադրբեջանը մտադիր չէ քաղաքացիական օդանավեր վայր գցել, սակայն «գոյություն ունեն Չիկագոյի կոնվենցիայի համապատասխան դրույթները, որոնք Ադրբեջանի կառավարությունը հաստատել է։ Ապօրինի չվերթը կասեցնելու համար ինքնաթիռին համապատասխան օդանավակայանում վայրէջի պարտադրումը նույնպես ներառված է կոնվենցիայում»,- ասել է Ազիմովը։
Օդանավակայանը վերագործարկելու Հայաստանի մտադրությունը, ըստ Արազ Ազիմովի, ապօրինի է, «ավելին` այստեղ կա նաև քաղաքական և քարոզչական ենթատեքստ»։
«Ազատություն» ռադիոկայանը հղում անելով «Թրենդ» լրատվական գործակալությանը փոխանցում է,որ Ազիմովն ասել է, որ Քաղաքացիական ավիացիայի միջազգային կազմակերպությունը (ICAO) և Քաղաքացիական ավիացիայի եվրոպական կոնֆերանսը (ECAC) այս հարցում սատարում են Ադրբեջանի դիրքորոշումը։