ԱՄՆ-ի հարավարևելյան նահանգներում գրանցված ռեկորդային ցրտերի պատճառով առնվազն 15 մարդ է զոհվել:
Թենեսի նահանգում, որտեղ ցրտերի զոհ է դարձել 11 մարդ, ջերմաստիճանը զրոյից 15 աստիճան ցածր է եղել, որը վերջին մի քանի տարիներին արձանագրված ամենացածր ջերմաստիճանն է: Երեք մարդ մահացել է Օհայո նահանգում, մեկը՝ Քենտուկիում: Ցրտերը ճանապարհներին երթևեկության խափանումներ են առաջացրել, որոնք բազմաթիվ վթարների պատճառ են դարձել, այդ թվում՝ նաև մահացու ելքերով:
«Մեր քաղաքը կաթվածահար է եղել: Հյուսիսային նահանգների բնակիչները ծիծաղում են մեզ վրա: Ես հասկանում եմ, սակայն մենք դրան սովոր չենք»,- Թենեսի նահանգի բնակիչների խոսքերն է մեջբերում NBC News-ը:
Ջերմաստիճանի կտրուկ նվազումը և առատ տեղումները ԱՄՆ-ի հարավային և հարավարևելյան նահանգների համար անսովոր երևույթ են: Կենտուկի, Միսուրի, Թենեսի և այլ նահանգներում նոր ձնաբքներ են սպասվում:
