Հունաստանում դարձյալ ցույցի են դուրս եկել հասարակական տրանսպորտի աշխատակիցները, բժիշկները, ֆերմերները, նավաստիները, էներգետիկները, պաշտոնյաները: Այս մասին հայտնում է ITAR-TASS-ը:
Այսօր Աթենքում չեն աշխատել ավտոբուսները, տրոլեյբուսները, մետրոյի որոշ հատվածներ, որ տանում են դեպի միջազգային օդանավակայան:
Մետրոն և տրամվայները աշխատում են միայն այն պատճառով, որ սպասարկող անձնակազմին սպառնում են կալանավորել. աշխատանքի դուրս չգալու համար նրանք կարող են դատապարտվել մինչև 5 տարվա ազատազրկման:
Այսօր հերթական 24-ժամյա գործադուլ են հայտարարել Հունաստանի երկաթուղու աշխատակիցները: Պատճառը աշխատավարձերի կրճատումն է:
Որպես համերաշխության նշան՝ մեկօրյա գործադուլ են հայտարարել նաև հույն էներգետիկները՝ Հունաստանի պետական էներգետիկ կորպորացիայի աշխատակիցները:
Բժիշկները բողոքում են առողջապահության ոլորտի վերակազմավորումից, անձնակազմի կրճատումից, իսկ նավաստիների հունական արհմիությունը՝ PNO, այսօր սկսել է «նախազգուշական» 48-ժամյա գործադուլ՝ բողոքելով Աշխատանքային օրենսգրքում կառավարության կատարելիք փոփոխությունների դեմ:
