Չինաստանում լայնորեն քննարկվում է տեղացի հայտնիների՝ դերասանուհի Չժան Ցզիիի և նրա ընկերոջ՝ ռոք-երաժիշտ Վան Ֆենի նշանադրությունը: Ֆենն իր սիրելիին առաջարկություն է արել անօդաչու թռչող սարքի՝ կվադրոկոպտերի օգնությամբ, հայտնում է South China Morning Post-ը:
Պարբերականը վկայակոչում է Netease կայքում հրապարակված լուսանկարները: Լուսանկարներում ժպտացող Չժան Ցզիին կանգնած է հսկայական տորթի և Վան Ֆենի միջև, որին մոտենում է զամբյուղով կվադրոկոպտերը: Հոդվածում նշվում է, որ դրա մեջ նշանադրության ադամանդե մատանի է եղել, որը հանելով՝ երիտասարդն առաջարկություն է արել իր սիրելիին:
Հաղորդվում է, որ դա եղել է փետրվարի 7-ին՝ Չժան Ցզիիի ծննդյան օրվա նախօրեին Վան Ֆենի կազմակերպած երեկույթի ժամանակ: Փետրվարի 9-ին դերասաուհին դարձել է 36 տարեկան:
Կիրակի օրը չինական ԶԼՄ-ները հայտնել են, որ դերասանուհին առաջարկությանը դրական պատասխան է տվել: Բացի դրանից՝ նա ինքն է դա հաստատել՝ Weibo-ի իր միկրոբլոգում գրելով. «Ես համաձայն եմ»:
