Արդեն երկու օր է` իրադարձությունների լարված զարգացումներ են Գյումրիում, ավելի ճիշտ` Սառնաղբյուր գյուղում, որտեղ, ինչպես հայտնի է, ձերբակալվել է հունվարի 14-15-ի իրադարձությունների մասնակիցներից մեկը` 22-ամյա Մնացական Ալեքսանյանը:
Սառնաղբյուր գյուղի բնակիչները հայտարարում են, որ նրան հանիրավի են ձերբակալել, ապօրինի, և իրավապահներին պահանջ են ներկայացրել բաց թողնել երիտասարդին` այլապես սպառնալով, որ կդիմեն այլ քայլերի, օրինակ` Գյումրի-Երևան ավտոմայրուղին փակելուն: Վերջնագրի ժամկետը կլրանա այսօր: Ինչ կլինի իրավիճակը Գյումրիում` կերևա առաջիկա ժամերի ընթացքում:
Ձերբակալությունն իսկապես տարօրինակ է, քանի որ հունվարյան իրադարձությունների տեսագրություններում երևում է, թե ինչպես է երիտասարդը կոչ անում ցուցարարներին, որպեսզի նրանք քարեր չնետեն ոստիկանների ուղղությամբ:
Հիշեցնենք, որ ցույցերը Գյումրիում յոթ մարդ գնդակահարելու մեջ կասկածվող ռուս զինծառայողին հայկական կողմին հանձնելու պահանջով էին:
Ստեղծված իրավիճակը ներկայումս իսկապես տարօրինակ է և անսպասելիորեն կրկին սրել է իրավիճակն ու հանրային ուշադրությունը ուղղել Գյումրի: Թե ում էր սա պետք կամ ինչի համար` դժվար է ասել: Սակայն մի բան հետաքրքրական է, որ դեպի Գյումրի է շեղվել Բերձորի հայտնի իրադարձությունների վրա կենտրոնացած հասարակական ուշադրությունը:
Ըստ որում` ևս հետաքրքրական է այն, որ Բերձորն էլ հասարակական ուշադրությունը, որպես իրադարձություն, շեղեց Գյումրիի ողբերգության հարցերից` հատկապես, երբ այդ օրերին տեղեկություններ տարածվեցին ռուսական ԶԼՄ-ներով, որ կասկածվող ռուս զինծառայողի դատավարությունը լինելու է ռուսական ռազմակայանի դատարանում և ռուսական օրենքների ենթակայությամբ բնականաբար: Ահա այդ ընթացքում պատահեց Բերձորի հայտնի բռնությունը, որը ցնցեց հասարակությանը: Սրան էլ հաջորդեց անսպասելի ձերբակալությունը Շիրակի մարզում` Գյումրիի դեպքերի կապակցությամբ, որն էլ հասարակության ուշադրությունը շեղեց Բերձորից:
Ընդհանուր առմամբ մենք, իհարկե, ականատես ենք լինում հասարակական ուշադրության, այսպես ասած, հարկադիր հետաքրքրական վոյաժների, որոնց «տուրօպերատորը» տեսանելի չէ, բայց ինչպես երևում է` բավական պրոֆեսիոնալ է:
