Ադրբեջանական SalamNews.org կայքը հաղորդում է, որ «Ադրբեջանի քաղաքացիական համերաշխություն» կուսակցության նախագահ, խորհրդարանական Սաբիր Ռուստամհանլըն մեկնաբանել է Բաքվում գտնվող Հունաստանի նախագահ Կարոլոս Պապուլյասի՝ կիպրական խնդրի շուրջ հնչեցրած հայտարարությունը:
Հիշեցնենք, որ վերջինս հայտարարել էր, թե Հունաստանը հուսով է, որ կիպրական խնդիրը լուծում կստանա ՄԱԿ ԱԽ-ի ընդունած բանաձևերի շրջանակներում, և որ նմանատիպ միջազգային խնդիրները պետք է իրենց լուծումը ստանան հենց այդ հարթությունում:
Այս կապակցությամբ Սաբիրը նշել է. «Անկախ նրանից, թե Հունաստանի նախագահն ինչ է ասել, Ադրբեջանը կիպրական հարցում մշտապես աջակցել և աջակցելու է Թուրքիային: Ես չեմ հավատում, թե Ադրբեջանը կարող է կիպրական հարցում Թուրքիայից տարբեր դիրքորոշում ունենալ: Մենք «մեկ ազգ ենք, երկու պետություն»»:
Հիշեցնենք, որ կիպրական խնդիրը շարունակում է չլուծված մնալ 1974 թվականից, երբ Հյուսիսային Կիպրոս ներխուժեցին թուրքական զորքերն ու գրավեցին Կիպրոսի տարածքի 37 տոկոսը (3355 քառակուսի կիլոմետր), ինչը թուրքական կողմն անվանում է «Խաղաղության շարժում»:
Ի դեպ, ողջ աշխարհում միայն Թուրքիան է ճանաչել Հյուսիսային Կիպրոսի անկախությունը, իսկ Ադրբեջանը Լեռնային Ղարաբաղի պատճառով զրկված է այդ գայթակղությունից:
Տարիներ առաջ Ադրբեջանը մտադիր էր ավիաչվերթեր կազմակերպել դեպի Հյուսիսային Կիպրոս: Սակայն հունական կողմը սպառնաց համարժեք կերպ վարվել` ավիաթռիչքեր կազմակերպելով դեպի Ստեփանակերտ: Դա իր ներգործությունն ունեցավ ադրբեջանական կողմի վրա, և նա հետ կանգնեց իր մտադրությունից:
Ինչ վերաբերում է Ադրբեջանի նախկին նախագահ Հեյդար Ալիևի կողմից շրջանառության մեջ դրված «մեկ ազգ, երկու պետություն» հասկացությանը, ապա թուրք-ադրբեջանական կողմն այդ առումով դեռ որոնումների մեջ է, քանի որ ներկայումս կարելի է հանդիպել նաև «մեկ ազգ, երեք պետություն» հասկացությանը` նկատի ունենալով նաև Հյուսիսային Կիպրոսը: Իրականում «մեկ ազգ, երկու պետություն» հասկացությունը բնորոշ է հենց մեզ` հայերիս:
