2010 թ. դեկտեմբերի 30-ին ԿԳՆ-ն ընդունել է «Կրթական համակարգում կոռուպցիոն երևույթների դեմ պայքարի 2010-11 թթ. միջոցառումների համալիր ծրագիրը», որում արձանագրված է, որ բուհերի ռեկտորներն իրենց տարեկան հաշվետվությունների մեջ պետք է նաև ներկայացնեն հակակոռուպցիոն պայքարի շրջանակներում իրականացված գործողությունները:
Կրթության և գիտության նախարար Արմեն Աշոտյանը այսօր կայացած հակակոռուպցիոն համաժողովի ընթացքում նշեց այն հիմնական պատճառները, որոնք հանգեցնում են կրթական համակարգի կոռուպցիոն երևույթներին: Նա մասնավորապես ասաց, որ կրթության ոլորտի թերֆինանսավորումը այսօր մեծ խնդիր է: Կրթության ոլորտի բյուջեի 30 տոկոսը տրամադրում է պետությունը, իսկ 70 տոկոսը կազմվում է ուսանողական վարձավճարների միջոցով, իսկ, օրինակ, եվրոպական և ամերիկյան բուհերի բյուջեն հիմնականում գոյանում է մասնավոր ոլորտի ներդրումների արդյունքում:
Մյուս հանգամանքը, որը, ըստ նախարարի, կոռուպցիայի պատճառ է դառնում, պարտադիր զինծառայությունից տարկետման իրավունքի առկայությունն է: Նրա խոսքերով, այս հանգամանքով պայմանավորված՝ թե՛ ներբուհական և թե՛ ընդունելության քննությունների ժամանակ բավականին ակտիվ են արտահայտված կոռուպցիոն երևույթները:
Աշոտյանը տեղեկացրեց, որ այդ ամենը կանխելու համար դեռևս անցյալ տարի նախարարությունը նվազեցրել է պետպատվերի շրջանակում տարկետման իրավունքով տեղերի քանակը և պետական բուհերին զրկել է վճարովի տարկետման իրավունքից: Նախարարի գնահատմամբ, այդ քայլերը արդյունավետ են, բայց բավարար չեն կոռուպցիոն երևույթները վերջնականապես վերացնելու համար:
Աշոտյանը խոստովանեց, որ բուհերում կոռուպցիան ուժգնանում է մասնավորապես մագիստրատուրա և ասպիրանտուրա ընդունվելու ժամանակ:
Նա նաև ընդգծեց, որ կոռուպցիայի աճին նպաստում է կրթության ցածր որակը, և կրթության որակը բարձրացնելու համար պետք է ամեն ինչ անել:
