Armtimes.com-ը գրում է. «Շաբաթ օրը Միներալնիե Վոդի քաղաքում, որտեղ անցյալ շաբաթ հայերի և ռուսների միջև զանգվածային ծեծկռտուք էր եղել, որի ընթացքում սպանվել էր ռուս զինվոր Դմիտրի Սինդորենկոն, մոտ 300 հոգի բողոքի ցույց են արել: Ինչպես նշում են ռուսական մի շարք լրատվամիջոցներ՝ «Կոմսոմոլսկայա պրավդա», «Բլոկնոտ» և այլն, չարտոնված այդ հանրահավաքի ժամանակ ռուսները ստորագրություններ են հավաքել, որպեսզի առաջիկայում արտոնված մեծ հանրահավաք անեն: Նրանք, ինչպես տեղեկացրել էինք, ռուս զինվորի սպանությունից հետո ազգայնական հայտարարություններ էին անում, մասնավորապես. «Հայաստան, հետ վերցրու քո որդիներին», «Կորչի հայկական նեոգաղութատիրությունը» և այլն:
Ըստ bloknot.ru-ի, ինչպես նաև Վկոնտակտե սոցցանցում Մինվոդիի բնակիչների հայտարարությունների, Ստավրոպոլի նահանգապետ Վլադիմիր Վլադիմիրովի հրահանգով ռուսական ուժային կառույցների ներկայացուցիչները շաբաթ օրը հայտարարված ազգային հավաքի նախօրեին մտել են քաղաքի բնակիչների տները և սպառնացել՝ չմասնակցել հանրահավաքին: Այդուամենայնիվ, «Օպերա» կարաոկե-բարի մոտ, որտեղ տեղի էր ունեցել ռուս զինվորի սպանությունը, հավաքվածները որոշել են փակել «Կովկաս» մայրուղին: Դա, սակայն, նրանց չի հաջողվել. մայրուղին փակ է մնացել ընդամենը 5-7 րոպե:
Ըստ bloknot.ru-ի, ազգային հավաքի վայրում մեծ քանակությամբ ոստիկանական ուժեր են հավաքված եղել: Հավաքի ընթացքում նաև ընդհարում է տեղի ունեցել ոստիկանների և Մինվոդիի բնակիչների միջև: Ռուսական ԶԼՄ-ները երեկ վիդեոկադրեր էին տարածել ոստիկանների և բնակիչների քաշքշուկից, որտեղ լսվում էր նաև, թե ինչպես է ոստիկաններից մեկը հավաքվածներին կապիկ անվանում: Թե ե՞րբ է տեղի ունենալու ազգային հավաքը՝ հայտնի չէ: Նշենք, որ ռուս զինվորի սպանության հիմնական կասկածյալ Միխայիլ Գրիգորյանը, ում նկատմամբ հետախուզում էր հայտարարվել, դեպքի հաջորդ օրը հայտնաբերվել է:
Մանրամասները՝ սկզբնաղբյուր կայքում
