Վրացական Apsny.ge կայքի փոխանցմամբ, Վրաստանը Ռուսաստանին առաջարկել է մասնակցել իր տարածքում գրանցված ահաբեկչական գործողությունների հետաքննությանը: Այս մասին հայտարարել է Վրաստանի նախագահի խոսնակ Մանանա Մանջգալաձեն:
Վերջինս նշել է, որ Ժնևում կայացած ռուս-վրացական վերջին բանակցությունների ժամանակ վրացական կողմը ռուսական կողմին է հանձնել Վրաստանի տարածքում նախկինում բացահայտված ահաբեկչություններին առնչվող նյութերը և առաջարկել համագործակցել, սակայն ռուսական կողմը դեռևս չի պատասխանել:
Միևնույն ժամանակ Մանջգալաձեն հայտարարել է, որ վրացական կողմը բոլոր հիմնավորումներն ունի նախորդ շաբաթ Քութաիսիում կանխված ահաբեկչական գործողության նախապատրաստման մեջ ռուսական հատուկ ծառայություններին կասկածելու համար:
Այդպիսի կասկածի տեղիք է տալիս այն, որ այդ դեպքի և Վրաստանում իրականացված նախկին ահաբեկչությունների հետաքննումը ցույց է տվել դրանցում ռուսական ձեռագրի առկայությունը:
Հիշեցնենք, որ մարտի 31-ին Քութաիսիում անցկացված հատուկ գործողությունների արդյունքում պայթուցիկ սարքեր էին հայտնաբերվել քաղաքապետարանի ու Արդարադատության վարչության շենքերի մոտ, որոնք պետք է գործեին միաժամանակ:
