Իտալական ԶԼՄ-ները հայտնում են, որ Իտալիայի նախկին վարչապետ Սիլվիո Բեռլուսկոնիի դեմ հարուցված աղմկահարույց «Ռուբիի գործով» դատական նիստը նշանակված է մարտի 11-ին: Գործի շրջանակներում Բեռլուսկոնին մեղադրվում է անչափահասների մարմնավաճառությանը մասնակցություն ունենալու մեջ:
Այսպիսով դատավճիռը կկայացվի խորհրդարանական ընտրություններից հետո, որը կայանալու է փետրվարի 24-25-ը, և այդ ընտրություններին Բեռլուսկոնին մասնակցում է որպես աջ կենտրոնամետ կոալիցիայի առաջնորդ:
Ավելի վաղ սպասում էին, որ վճիռը կկայացվի մինչ ընտրությունները, սակայն քաղաքական գործչի փաստաբանները նպատակադրվել էին նախընտրական քարոզարշավի ժամանակ դադարեցնել գործի քննությունը:
Դատավորների կոլեգիան չնայած նրան, որ փաստաբանների պահանջով չդադարեցրեց գործի լսումները, այնուամենայնիվ, վերանայեց լսումների օրացույցը և դատախազությանը, որը մեղադրող կողմն է, առաջարկեց ժամանակ վերցնել մտածելու համար և միայն մարտի 4-ին հանդես գալ մեղադրական վճռով:
Բեռլուսկոնիի դեմ դատական գործընթացը սկսվել է 2011 թ. ապրիլից: Ըստ քննության արդյունքների՝ Բեռլուսկոնին ինտիմ հարաբերությունների մեջ է եղել մարոկկացի Ռուբիի հետ, ում 18 տարին այն ժամանակ դեռ լրացած չի եղել: Անչափահաս աղջկա հետ երեկույթներն անցկացվել են նախկին վարչապետի վիլլայում:
