Այսօր ԱԺ-ում գազամատակարարման համակարգի վերաբերյալ լսումների ժամանակ Հանրային ծառայությունները կարգավորող հանձնաժողովի նախագահ Ռոբերտ Նազարյանը հայտարարեց, թե ՀՀ-ում գազի սակագինը հիմնականում ցածր է եվրոպական երկրների գազի սակագներից:
«Մասնավորապես` բնակչության համար վաճառվող 1000 խմ գազի սակագինը, որը ՀՀ-ում 341 ԱՄՆ դոլար է, Էստոնիայում կազմում է 529 ԱՄՆ դոլար, Լատվիայում` 538 ԱՄՆ դոլար, Ֆրանսիայում` 818 ԱՄՆ դոլար և այլն»,- հատարարեց Ռ. Նազարյանը:
Մեր հարցին, թե որտեղի՞ց են վերցված նման թվեր` Ռ.Նազարյանը նախ ասաց, թե դրանք վերցված են յուրաքանչյուր երկրների համապատասխան կառույցների սայթերից, հետո` թե այդ թվերը վերցված են «Եվրոստատից»:
Իսկ հարցին, թե եվրոպական երկրներում իր ասած սակագների մեջ ներառվա՞ծ են տեղական հարկերը` Ռ. Նազարյանը պատասխանեց, թե դա «իր խնդիրը չէ»:
Նշենք, որ իրականում տեղական հարկերը պետք է հանել` ստանալու համար մատակարարողի կողմից սհմանված գազի գինը: Մեզ չհաջողվեց ձեռք բերել պարոն Նազարյանի ձեռքի այդ ցուցակը, չհաջողվեց նման թվեր գտնել նաև «Եվրոստատում»:
