Մադրիդի «Ռեալ»-ի գլխավոր մարզիչ Ժոզե Մոուրինյոն Չեմպիոնների լիգայի քառորդ եզրափակիչի «Տոտենհեմ»-ի հետ կայանալիք հանդիպման նախօրեին հայտարարել է, որ հույս է կապում պահեստայինների հետ, քանի որ ամենայն հավանականությամբ ակումբի առաջատարները չեն կարողանա օգնել թիմին:
Հիշեցնենք, որ վաղը կայանալիք «Տոտենհեմ»-ի հետ խաղում «արքայական» ակումբին չեն կարողանա օգնել Ռոնալդուն, Բենզեման, Կական և Մարսելոն:
«Իմ աշխատած յուրաքանչյուր ակումբում բոլոր ֆուտբոլիստներն արել են առավելագույնը: Անշուշտ, Ռոնալդուի վնասվածքը ցավոտ հարված էր ակումբի համար, բայց ինչ արած: Կօգտագործենք նրանց, ովքեր կան:
«Տոտենհեմ»-ը հրաշալի ակումբ է` բարձր որակավորում ունեցող մարզչով ու ուժեղ խաղացողներով»: Նրանք արժանիորեն են հայտնվել քառորդ եզրափակիչում` մինչ այդ հաղթելով գործող չեմպիոններին ու «Միլան»-ի նման հզոր թիմին»,-Մոուրինյոյի խոսքերն է մեջբերում Marca-ն:
Նշենք, որ «Տոտենհեմ»-ի արգելքը հաղթահարելու դեպքում «Ռեալ»-ը կիսաեզրափակիչում կհանդիպի «Բարսելոնա»-«Շախտյոր» զույգի հաղթողի հետ:
