ՀՀ նախագահի թեկնածու Րաֆֆի Հովհաննիսյանի նախընտրական շտաբը չի կրելու ձևական, ֆորմալ, ուղղահայաց կառուցվածք: Լինելու է շարժունակ, նախաձեռնող քարոզարշավ, որը կարտացոլվի շտաբի կառուցվածքով: Այսօր լրագրողների հետ հանդիպման ժամանակ այս մասին ասաց ՀՀ նախագահի թեկնածու, «Ժառանգություն» կուսակցության նախագահ Րաֆֆի Հովհաննիսյանը՝ անդրադառնալով իր նախընտրական քարոզչությանը:
Նա տեղեկացրեց, որ այսօր նախնական քննարկում տեղի կունենա, իսկ կիրակի տեղի կունենա պաշտոնական նիստը, կհայտարարվեն թե՛ գործառութային, թե՛ ֆունկցիոնալ պատասխանատուները և հավաքական պատասխանատվությամբ կշարունակեն իրենց աշխատանքները:
«Քարոզարշավի պատասխանատուն ես եմ լինելու մի շարք ուժերի զորակցությամբ, իսկ կիրակի օրը կհրապարակենք ամբողջ կազմը: Երկուշաբթի օրը քարոզարշավի պաշտոնական մեկնարկը կլինի Ազատության հրապարակից: Շտաբների քանակը ընթացս կորոշվի, մենք արդեն ունենք մի քանի գործող գրասենյակներ, որոնք կշարունակեն իրենց գործունեությունը:
Քարոզարշավի ընթացքում մենք կտանենք մեր հետագիծը, մեր քարոզարշավը շատ անմիջական է լինելու դեպի գյուղը և քաղաքը, առանց կաշկանդվածության, բնական կերպով»,- մանրամասնեց բանախոսը՝ շարունակելով, որ յուրաքանչյուր մարզ կունենա իրեն սպասարկող կամավորական խումբը, կունենան ներկայացուցիչներ բոլոր ընտրատեղամասերում և կտանեն իրենց խոսքը վաղվա Հայաստանի մասին:
Անդրադառնալով Հայաստանների մասին իր մեկնաբանության հասցեին հնչած քննադատություններին՝ նա ուղղեց տարընթերցումը. «Հայաստանը մեկն է, հայրենիքը մեկն է, ես համարում եմ, որ ունենք մեկ հայրենիք: Երբ կա չարակամություն, մարդիկ սեփական ասելիք չունեն, կառչում են ուրիշի խոսքից:
Բոլոր դեպքերում, մենք ունենք մեկ Հայաստանի տարբեր պատկերների միջև ընտրություն՝ դե ֆակտո և դե յուրե ՀՀ-ի, ստվերի և լույսի միջև ընտրություն: Սրանք ընտրություններ են, սրանք չեն նշանակում, որ ունենք տարբեր երկրներ և հայրենիքներ: Եթե իմ պահվածքից չեն հասկացել, որ ՀՀ-ն մեկն է, ունենք ընտրություն՝ ՀՀ-ի տեսակների միջև»:
