Իսրայելի վարչապետ Բենիամին Նեթանյահուն այսօր երկրի պաշտպանության նախարար Էհուդ Բարաքի, գեներալ Գադի Այզենկոտի և Իսրայելի հարավային շրջանի հրամանատար Տալ Ռուսոյի հետ այցելել է Գազայի հատվածում տեղակայված Իսրայելի պաշտպանության բանակի ռազմաբազա` տեղեկացնում է mignews.com-ը:
Այցի ժամանակ Իսրայելի վարչապետը մեկնաբանել է ԱՄՆ նախագահ Բարաք Օբամայի՝ իր քաղաքականությանը տված գնահատականը:
Հիշեցնենք. Օբաման կարծիք էր հայտնել, որ իսրայելցի դիվանագետի գործողությունները հանգեցնում են նրան, որ Իսրայելը ռիսկի է դիմում և կարող է մոտ ապագայում հայտնվել միջազգային մեկուսացման մեջ:
Քննադատական գնահատականներն առաջին հերթին վերաբերել են իսրայելցի վարչապետի՝ հրեական բնակավայրերի կառուցում սկսելու որոշմանը` չնայած միջազգային հանրության դժգոհությանը:
«Բոլորն են հասկանում, որ միայն իսրայելցի քաղաքացիները կարող են որոշել՝ ով է Իսրայելի շահերի իրական կրողը»,- ի պատասխան` ասել է Նեթանյահուն:
Բացի այդ՝ նա նաև հավելել է, որ Իսրայելն ամբողջ ժամանակ ստիպված է եղել հակազդել դիվանագիտական լուրջ ճնշմանը:
«Ես շարունակելու եմ պաշտպանել Իսրայելի կենսական կարևոր շահերը ու պայքարել դրանց անվտանգության համար»,- ասել է Նեթանյահուն:
