Հինգշաբթի օրը Եվրախորհրդարանը Ստրասբուրգում լիագումար նիստի ժամանակ քվեարկության արդյունքում վավերացրել է ԵՄ-ի հետ Վրաստանի ասոցացման մասին համաձայնագիրը: Այս մասին հայտնում է Ria Novosti-ն:
Փաստաթղթին կողմ է քվեարկել 490, դեմ՝ 76 պատգամավոր, 57 պատգամավոր ձեռնպահ է մնացել:
Քվեարկության ժամանակ Եվրախորհրդարանի դահլիճում ներկա են եղել ինչպես Վրաստանի ներկայիս նախագահ Գեորգի Մարգվելաշվիլին, այնպես էլ՝ նախկինը՝ Միխեիլ Սաակաշվիլին, որի նկատմամբ հետախուզում է հայտարարված իր երկրում:
Վրաստանը 2014 թ. հունիսի 27-ին ստորագրել է ԵՄ-ի հետ ասոցացման մասին համաձայնագիրը, որը նախատեսում է մուտք ԵՄ ազատ առևտրի գոտի: Վրաստանի խորհրդարանը համաձայնագիրը վավերացրել է հուլիսի 18-ին, իսկ սեպտեմբերի 1-ից համաձայնագրի մեծ մասը սկսել է գործել: Որպեսզի փաստաթուղթը լիովին ուժի մեջ մտնի անհրաժեշտ է, որ այն վավերացվի նաև ԵՄ անդամ երկրների խորհրդարաններում: Մինչ օրս այն վավերացրել է ԵՄ անդամ 10 երկիր:
