«Պետք է թույլ չտալ ստահակներին պղծել հայրենիքը»,- այսօր այս մասին ազատամարտիկների մեծ հավաքի ընթացքում ասաց ազատամարտիկ Մյասնիկ Մալխասյանն՝ անդրադառնալով իր մարտական ընկերների նկատմամբ իրականացված ոտնձգություններին:
Նա իր զինակից ընկերներին դիմեց, ասելով, որ իրենց համար ծանր ժամանակներ են, ավելի ծանր, քան այն օրերին, երբ ազատամարտիկներն իրենց արյան կանչով զենք վերցրին պայքարելու հանուն ՀՀ ազատության, հանուն Արցախի, Ղարաբաղի ազատագրման և չէր անցնում մտքով, որ մի օր կարող են ինչ որ ստահակներ ձեռք բարձրացնել ազատամարտի հերոսների վրա: «Եթե ճակատագրի բերումով նրանք ողջ են մնացել և այսօր Եռաբլուրում չեն, դա չի նշանակում, որ որևիցե մեկն իրավունք ունի ձեռք բարձրացնել հայոց սրբության սրբոցի վրա»,- ասաց Մալխասյանը :
Նա տեղի ունեցածը ժողովրդին ուղղված մարտահրավեր որակեց: Ըստ նրա՝ կարելի է տեղի ունեցածից հետևություն անել, որ վտանգ է սպառնում Արցախին և այսօր իշխանությունները ցանկանում են ձերբազատվել տղաներից, որոնք թույլ չեն տալու , որ Արցախին վտանգ սպառնա: «Եկել է ժամը ոտքի կանգնելու և թույլ չտալու այդ ստահակներին, որոնք պղծում են հայրենիքը»,- ասաց Մալխասյանը:
Հիշեցնենք, որ դեկտեմբերի 10-ի հանրահավաքի ժամանակ ազատամարտիկ Սմբատ Հակոբյանն էր տեղեկացրել, որ այսօր հավաք է անցկացվելու: Եռաբլուր էին ժամանել մարզերից, քանի որ նրանց խիստ վրդովվեցրել են իրենց մարտական ընկերների նկատմամբ կատարվող բռնությունները: