Իսպանական AS հանդեսի գլխավոր խմբագիր Ալֆրեդո Ռելանյոն մեկնաբանել է Մադրիդի «Ռեալ»-ի վերջին անհաջողությունները:
«Երեկ տեղի ունեցած «Օսասունա» – «Ռեալ» հանդիպման հաշիվը պայմանավորված էր ոչ թե պապլոնցիների մարտական տրամադրվածությամբ, այլ «արքայական ակումբ»-ի ֆուտբոլիստների հոգնածությամբ և անօգնականությամբ: Այսպիսով՝ հայտնի դարձավ, թե ինչ նշանակություն ունի Քրիշտիանու Ռոնալդուն ներկայիս «Ռեալ»-ի համար: Առանց նրա թիմի ցուցադրած խաղը դիտարժան չէ: «Բլանկոսներ»-ը խաղում էին առանց կրքի ու ցանկության: «Ռեալ»-ն ընթացիկ մրցաշրջանում բազմաթիվ անհաջող հանդիպումներ է ունեցել, սակայն այդքան վատ վաղուց հանդես չի եկել: Ճիշտ է, բացակայում էին նաև Պեպեն ու Սերխիո Ռամոսը, ակայն «Ռեալ»-ը դիմակայում էր ոչ թե «Բարսելոնա»-ին, այլ մրցաշարային աղյուսակը եզրափակող «Օսասունա»-ին:
Կարծում եմ՝ այժմ Ռոնալդուի բոլոր քննադատներն այլևս որևէ փաստարկ չեն ունենա: Ակնհայտ է, որ նա «արքայական ակումբ»-ի առաջատարը, հոգին և շարժիչ ուժն է: Հանդիպումն ապացուվեց, որ Ֆլորենտինո Պերեսը պետք է անի հնարավոր ամեն բան Պորտուգալիայի ընտրանու ֆուտբոլիստին իր թիմում պահելու համար, այլապես նրա հավակնոտ նախագիծը անհաջողության կմատնվի»,- նշել է լրագրողը:
