Ադրբեջանի պաշտպանության նախարար Զաքիր Հասանովը այսօր ընդունել է այդ երկրում Թուրքիայի արտակարգ և լիազոր դեսպան Իսմաիլ Ալպեր Ջոշգունին: Այս մասին Trend-ին հայտնել են Ադրբեջանի պաշտպանության նախարարության մամլո ծառայությունում:
Հանդիպման ընթացքում քննարկվել են Ադրբեջանի և Թուրքիայի զինված ուժերի զարգացման ոլորտում անցկացվող միջոցառումները, երկկողմ ռազմական համագործակցության նշանակությունը, ռազմաքաղաքական իրավիճակը տարածաշրջանում, ինչպես նաև Լեռնային Ղարաբաղի հակամարտության կարգավորման կարևորությունը տարածաշրջանի համար:
Ադրբեջանի պաշտպանության նախարարը նշել է երկու երկրների զինված ուժերի փոխադարձ այցելությունների նշանակությունը, նաև համատեղ զորավարժությունների անցկացումը: Նրա խոսքով՝ Ադրբեջանի և Թուրքիայի հարաբերությունները ռազմատեխնիկական համագործակցության և ռազմական կրթության ոլորտում դինամիկ կերպով զարգանում են, և հետագայում ծրագրվում է շարունակել այդ ուղղությամբ աշխատանքը:
Հանդիպման ընթացքում քննարկվել են նաև երկու երկրների զինված ուժերի համագործակցության հեռանկարները, կողմերը կարծիքներ են փոխանակել նաև այլ հարցերի շուրջ:
