«Բարգավաճ Հայաստան» խորհրդարանական խմբակցության պատգամավոր Միքայել Մելքումյանի դիտարկմամբ՝ դրամի արժեզրկումը պետք է վաղուց լիներ, հիմքեր չկային, որ դրամն այդ մակարդակի վրա կմնար: «Բայց այն, որ թռիչքաձև եղավ, չի խոսում այն մասին, թե Կենտրոնական բանկը հաշվի է առել սպառողի շահերը: ԿԲ-ն ունի ծավալուն աշխատակազմ, որոնք պետք է այդ կանխատեսումներն անեին»,- ասաց նա Մեդիա կենտրոնում հրավիրված քննարկման ընթացքում:
Նրա խոսքերով՝ դոլարի կուրսի բարձրացման հարցում անկասկած մեծ դեր են խաղացել Ռուսաստանի նկատմամբ կիրառված պատժամիջոցները:
Մելքումյանի կանխատեսմամբ՝ մինչև տարեվերջ էական տատանումներ չեն լինի. «Նույնիսկ ես կարծում եմ, որ դեկտեմբերի 15-ից հետո 5-7 դրամով ներքև կիջնի»:
Քննարկման բանախոսներից տնտեսագետ Վիլեն Խաչատրյանը անդրադարձավ Կենտրոնական բանկի այն հայտարարությանը, թե դոլարի կուրսի բարձրացումը կնպաստի տրանսֆերտների գնողունակությանը. «Մենք մեր ընթացիկ տրանսֆերտները ստանում ենք Ռուսաստանից, իսկ այնտեղ ռուբլին արժեզրկվում է, ուստի Հայաստան ուղարկելու դեպքում գնողունակության մասին խոսք լինել չի կարող: Ինչ վերաբերում է ապրանքների արտահանմանը, ապա մենք ստանդարտ քանակությամբ արտահանում ունենք, և դա էական ազդեցություն չի թողնի: Մենք չպետք է ակնկալենք, որ այս փոփոխությունը էական ազդեցություն կթողնի»:
ՀԱԿ վարչության անդամ, տնտեսագետ Վահագն Խաչատրյանն էլ ընդգծեց, որ մեր բյուջեն դեռևս հաստատված չէ, և նրա կարծիքով՝ դա լուրջ թերություն է. «Ինչպե՞ս է լինում, որ ԿԲ-ը եզրակացություն է ներկայացնում բյուջեի մասին և ոչ մի խոսք չկա այն մասին, թե եկեք ոչ թե դոլարի կուրսը 411 հաշվենք, այլ, ասենք, 460: Ընդամենը խոսք կա ռիսկերի մասին, բայց որևէ լուրջ առաջարկություն չկա: Բանկերում լուրջ խնդիրներ են առաջացել՝ այն, ինչ տեղի ունեցավ 2009-ին, լուրջ խնդիրներ առաջացրեց, երբ բանկերը հսկայական կորուստներ ունեցան, նրանց միլիոնավոր դոլարների վնասները չփոխհատուցվեցին»:
Խաչատրյանը հավելեց, որ ցավալի է այն հանգամանքը, որ այս գործընթացին մասնակցում է նաև Արժույթի միջազգային հիմնադրամը. «Ո՛չ ֆինանսների նախարարությունը, ո՛չ Կենտրոնական բանը, ո՛չ Արժույթի միջազգային հիմնադրամը լուրջ չեն վերաբերվում: Մենք այդքան խոսում ենք Ռուսաստանից, բայց իրենք երևի բյուջեի չորս տարբերակ ունեն: Իսկ մերոնք ասում են, թե օգոստոս ամսին է բյուջեն հաշվարկվել, հետո՞, հնարավորություն չկա՞ր փոխելու»:
