«Որքան էլ փոքր լինի ՀՀ-ԵՄ հարաբերությունների օրակարգը, Հայաստանն այդ մասին հստակ պետք է խոսի»,- այսօր այս մասին Հայաստանի ամերիկյան համալսարանի Մանուգեան դահլիճում, դեսպանական դասախոսությունների շարքի շրջանակում, որը կազմակերպել է Ժան Մոնեի անվան Եվրոպագիտության ամբիոնի ղեկավար, ՀԱՀ քաղաքագիտության և միջազգային հարաբերությունների բաժնի ասիստենտ-պրոֆեսոր Սյուզաննա Վասիլյանը, ասաց ՀՀ-ում Մեծ Բրիտանիայի արտակարգ և լիազոր դեսպան Քեթրին Ջեյն Լիչը՝ իր ելույթում անդրադառնալով նաև ԵՄ-ՀՀ հարաբերություններին:
Նա նշեց, որ ԵՄ-ում առկա բավականին հզոր բյուրոկրատիան վերաբերում է նաև ԵՄ «Արևելյան գործընկերությանն» ու այդ ծրագրի մաս կազմող վեց երկրներին: Սակայն Հայաստանի հարցում անցյալ տարի իրենք անակնկալ ապրեցին, երբ հայտարարվեց Եվրասիական տնտեսական միությանը միանալու մասին: Սակայն, ըստ դեսպանի, դա Հայաստանի որոշումն էր, որը նրանք հարգում են: Ներկայումս, նրա խոսքով, հիմնական խնդիրն այն է, թե ինչպես կարելի է շարունակել և զարգացնել ԵՄ-ՀՀ հարաբերությունները:
Քեթրին Ջեյն Լիչը հիշեցրեց, որ անցյալ տարի Վիլնյուսում կայացած ԱլԳ գագաթնաժողովի ժամանակ տեղի է ունեցել ՀՀ-ԵՄ նամակների փոխանակում, և պարզ է դարձել, որ Հայաստանը հանձնառու է շարունակելու իր հարաբերությունները ԵՄ-ի հետ մարդու իրավունքների, ժողովրդավարական ինստիտուտների զարգացման, արդարադատության և մի շարք այլ ոլորտներում: «Որոշ ոլորտներում ևս մտադրություն կա շարունակել, և գյուղատնտեսության ոլորտում ՀՀ-ին մեծ աջակցության ծրագիր է սկսվել»,- ասաց դեսպանը:
Նա նշեց, որ պետք է հիշել, որ ԵՄ-ն համակարգային և բարդ կազմակերպություն է, կանգնած է ներքին խնդիրները հաղթահարելու խնդրի առջև՝ փորձելով ավելի լայն օրակարգ հաստատել՝ տնտեսապես ինտեգրելով ողջ աշխարհին:
«ԵՄ-ի հետ հարաբերություններ զարգացնելու ամենալավ տարբերակը հետևյալն է. հստակ հասկանալ, թե ինչ է ցանկանում երկիրը, և հստակ ասել այդ մասին: Եթե նույնիսկ օրակարգը փոքր է, պետք է հստակ ասել այդ մասին: Ես լիահույս եմ, որ մյուս տարվա ընթացքում ավելի հստակ կլինի իրավիճակը ՀՀ-ԵՄ հարաբերություններում, կկարողանանք առաջ ընթանալ՝ ավելի արագ հստակեցնելով համագործակցության շրջանակը, երբ ՀՀ-ն ԵՏՄ անդամ լինի: Մեծ Բրիտանիան համարում է, որ եթե ՀՀ-ն ցանկանում է շարունակել աշխատել ԵՄ-ի հետ, պետք է օգնել ՀՀ-ին, օգնել ժողովրդավարականացնել երկիրը, կոռուպցիան, մենաշնորհները վերացնել, որոնք հատուկ են տրանսֆորմացիայի մեջ գտնվող տնտեսություններին»,- ասաց դեսպանը:
Հարցին, թե ի՞նչ հստակության մասին է խոսքը, Քեթրին Լիչը պատասխանեց, որ կարծում է՝ առանցքային հարցն այն է, թե ինչ տնտեսական հարաբերություններ կարող էին լինել ՀՀ-ի և ԵՄ-ի միջև: Նա մատնանշեց էներգետիկ և տրանսպորտային քաղաքականությունները: Սակայն նա նաև ընդգծեց, որ կա չափանիշների հարց, այսինքն՝ ԵՏՄ-ում այլ չափանիշներ են լինելու, առնվազն չափանիշներ, օրինակ, գյուղատնտեսության և այլ ոլորտներում: «Հարցն այն է, թե ի՞նչ մակարդակով Հայաստանը կարող է ներդաշնակեցնել իր աշխատանքը ԵՄ-ի հետ տարբեր ոլորտներում»,- ասաց դեսպանը:
