Թբիլիսիի Վերաքննիչ դատարանը բավարարել է Վրաստանի պաշտպանության նախկին նախարար Իրակլի Օկրուաշվիլիի փաստաբանների հայցը և չեղյալ հայտարարել 2008 թվականի մարտի 28-ին Թբիլիսիի քաղաքային դատարանի կայացրած որոշումը, համաձայն որի՝ նախկին նախարարը պետք է 11 տարի անցկացներ բանտում: Այս մասին հայտնում է Novosti-Gruziya գործակալությունը:
Թբիլիսիի քաղաքային դատարանը հեռակա կարգով Օկրուաշվիլիին դատապարտել էր 11 տարվա ազատազրկման՝ «առանձնապես խոշոր չափով կաշառակերության և կազմակերպված խմբի կողմից շորթում իրականացնելու» համար:
Մեղադրանքները Օկրուաշվիլիի վրայից հանվել են վկայությունների անբավարարության հիմքով:
Չնայած Վերաքննիչ դատարանի վճռին` Օկրուաշվիլին շարունակում է մնալ կալանքի տակ այլ գործով` կապված 2011 թվականի մայիսի դեպքերի հետ: Թբիլիսիի քաղաքային դատարանը նրան հեռակա կարգով դատապարտել է նախնական կալանքի:
