«Երևի կատարվեց հետևյալը, բարձրաձայն այդ մասին չէր խոսվում, բայց երբ ակտիվորեն շրջանառության մեջ էին դրել միասնական թեկնածուի գաղափարը, ըստ երևույթին, որոշ ուժեր գրպանում պահած ունեին միասնական թեկնածուի՝ իրենց համար միակ ընդունելի անունը, ասենք, Ծառուկյանին «դեմ տալը» և նրա ստվերում առաջ շարժվելը»,- «168 ժամ»-ի թղթակցի հետ զրույցում ասել է Աժ նախկին փոխնախագահ Կարապետ Ռուբինյանը՝ պատասխանելով դիտարկմանը՝ փաստորեն այն ուժերը, որոնք առաջինն էին խոսում միասնաբար ընտրություններին գնալու անհրաժեշտության մասին և ակտիվորեն «կոնսուլտացիաներ» էին նախաձեռնում, առաջինը հրաժարվեցին պայքարից:
«Չստացվեց, և երբ արդեն այդ համաձայնության փնտրտուքը միասնական թեկնածուի շուրջ դադարեց, դա նշանակում է, որ այլ տարբերակներ իրենք չեն էլ պատկերացրել: Դա ավելի ակնհայտ դարձավ երկրորդ հրաժարականից հետո՝ Տեր-Պետրոսյանի կողմից»,- նշել է Կ.Ռուբինյանը:
Ըստ նրա՝ ՀԱԿ-ն էլ իր հերթին իր շարքերին կերակրում էր մի այլ անիրական զարգացման հեռանկարով, որ Ծառուկյանը պիտի սատարի Լևոն Տեր-Պետրոսյանին: «Հիմա, երբ այդ երազանքները հօդս ցնդեցին, վերացավ նաև շարժառիթը՝ միասնական թեկնածու փնտրելու և ընդդիմությանը դրա շուրջ համախմբելու վերաբերյալ»,- ասել է նա:
