Անցած տարին ԱՄՆ-ում ամենաշոգն է եղել օդերևութաբանական ուսումնասիրությունների պատմության ողջ ընթացքում (1895 թվականից): 2012 թվականին միջին ջերմաստիճանը կազմել է 12.9 աստիճան, ինչը 0.6 աստիճանով գերազանցել է 1998-ի ռեկորդը:
Ամենաշոգը եղել է հուլիսը. միջին ջերմաստիճանը կազմել է 24.9 աստիճան, ինչն ամենաբարձր ցուցանիշն է օդերևութաբանական ուսումնասիրությունների ողջ ընթացքում: Ինչպես նշում են գիտնականները, նման շոգ տարվա պատճառը գլոբալ տաքացումն ու կլիմայի բնական փոփոխություններն են։ Այս մասին հայտնում է ITAR-TASS-ը:
2012 թվականին ԱՄՆ-ում տեղի է ունեցել եղանակի հետ կապված 11 բնական աղետ, որոնց թվում է հոկտեմբերի վերջին երկրի արևելյան ափին հարվածած կործանարար «Սենդի» փոթորիկը և մի քանի ամիս շարունակված երաշտը, որն իր տիրապետության տակ էր առել երկրի տարածքի 2/3-ը:
Գիտնականների եզրակացությունները հիմնված են երկրի բոլոր նահանգների ավելի քան 1200 օդերևութաբանական կայանների ցուցմունքների վրա՝ բացառությամբ Ալյասկայի և Հավայան կղզիների: Ալյասկայում, հակառակը, անցած տարին միջինից ավելի ցուրտ և անձրևոտ է եղել:
