Էլեկտրամոբիլներ արտադրող Tesla ընկերության և SpaceX տիեզերական կորպորացիայի հիմնադիր, հայտնի ամերիկացի ձեռնարկատեր Էլոն Մասքը պատրաստվում է իրագործել նոր հավակնոտ նախագիծ. նա նախատեսում է ուղեծիր ուղարկել 700 ոչ մեծ հեռահաղորդակցական արբանյակներ, որոնք ամբողջ աշխարհում հասանելի կդարձնեն համացանցը: Այս մասին գրում է The Wall Street Journal-ը:
Տվյալ նախագիծը Մասքը նախատեսում է իրագործել Google-ի նախկին թոփ մենեջեր Գրեգ Ուայլերի հետ, որը մեծ փորձ ունի արբանյակային ոլորտում:
Գործընկերները նախատեսում են տիեզերք ուղարկել 113 կգ-ից ոչ ավելի քաշով սարքավորումներ, ինչը կրկնակի քիչ է ամենափոքր հեռահաղորդակցական արբանյակներից: Դրանց արժեքը ևս ավելի փոքր կլինի՝ չի գերազանցի 1 մլն դոլարը: Արբանյակները տիեզերք կառաքեն SpaceX ընկերության Falcon 9 հրթիռները:
Նոր համացանցային արբանյակների համար նախատեսվում է նոր գործարան կառուցել՝ հավանաբար Ֆլորիդա կամ Կոլորադո նահանգներում: Նշվում է, որ նախագծում ներդրումները կկազմեն մոտ 1 մլրդ դոլար:
Եթե այս ծրագիրը հաջողվի իրագործել, ապա գործընկերների արբանյակների խումբը տասն անգամ ավելի մեծ կլինի, քան աշխարհում արբանյակային հեռախոսակապի ամենամեծ օպերատորինը՝ ամերիկյան Iridium Comminications-ինը:
