Facebook-ի հիմնադիր Մարկ Ցուկերբերգը օգտատերերի հետ հանդիպման ժամանակ ասել է, որ վիրավորված է «Սոցիալական ցանց» ֆիլմից, հայտնում է The New York Post-ը: Դևիդ Ֆինչերի այդ ֆիլմը թողարկվել է 2010 թ.: Գլխավոր դերը խաղացել է Ջեսի Այզենբերգը:
«Նրանք պարզապես շատ նյութ են հորինել, ինչը ես իսկապես վիրավորական եմ համարում: Նրանք հորինել են այդ ամբողջ սյուժետային գիծն այն մասին, որ ես ինչ-որ կերպ որոշել եմ ստեղծել Facebook-ը աղջիկների գրավելու համար»,- ասել է Ցուկերբերգը: «Իրականում դա շատ համառ աշխատանք է: Եթե նրանք իսկապես ֆիլմ ստեղծեին (այն մասին, թե Ցուկերբերգն ինչպես է ստեղծել Facebook-ը), դա կլինեի ես՝ 2 ժամ շարունակ կոդեր գրողս»,- ավելացրել է նա:
Ցուկերբերգը նաև ասել է, որ նախքան «Սոցիալական ցանցերը» դիտելը ինքը երբեք չի լսել Էփփլթինի կոկտեյլի մասին, բայց խոստովանել է, որ ֆիլմի թողարկումից հետո այդ ըմպելիքը սիրվել է սոցցանցի գրասենյակում:
Ներկաներից մեկը Ցուկերբերգին հարցրել է, թե ինչու է նա ամեն օր «նույն շապիկը» կրում: «Ես իրականում ուզում եմ մաքրել իմ կյանքը, որպեսզի այնքան քիչ որոշումներ ընդունեմ, որքան դա հնարավոր է (Facebook-ի վրա կենտրոնանալու համար)»,- ասել է Ցուկերբերգը: «Ես իմ աշխատանքը չեմ անում, եթե էներգիաս ծախսում եմ որևէ հիմար կամ թեթևամիտ բանի վրա»,- ավելացրել է նա:
