Ուկրաինացի բիզնեսմեն Դմիտրի Ֆիրտաշի նկատմամբ, որը գարնանից Վիեննայում է և սպասում է ԱՄՆ իր արտահանձնման մասին որոշմանը, մահափորձ է պատրաստվել: Ենթադրյալ վարձու մարդասպաններն Ավստրիայի մայրաքաղաք են գնացել Հունգարիայից ու Ռումինիայից և արդեն քաղաքում տուն են վարձել, հայտնում է ավստրիական Die Presse թերթը՝ հղում անելով Ավստրիայի գլխավոր դատախազ Վերներ Պլյայշլին:
Պարբերականի տեղեկությամբ՝ Ֆիրտաշի սպանությունը պատվիրել են Հունգարիայից (Ֆիրտաշին պատկանող Group DF-ում ընդգրկված ձեռնարկությունների մեծ մասն այնտեղ է գործում): Հաղորդվում է, որ պատրաստվող մահափորձի պատճառը կարող էր լինել Ֆիրտաշին պատկանող Emfesz հունգարական ընկերության շուրջ վեճը:
Ֆիրտաշի դեմ պատրաստվող մահափորձի մասին տեղեկությունը հաստատել է նաև գերմանական հետախուզությունը:
Պարբերականը նշում է, որ Ֆիրտաշը Վիեննայում տեղաշարժվում է 12 թիկնապահի ուղեկցությամբ: Նա ձերբակալվել է 2014թ. մարտին ԱՄՆ ՀԴԲ-ի հայտով: Շուտով նա Ավստրիայի համար ռեկորդային 125 մլն եվրո գրավի դիմաց ազատ է արձակվել չբացակայելու մասին ստորագրությամբ:
ԱՄՆ-ը Ֆիրտաշին մեղադրում է 2006-2007 թթ. տիտան պարունակող հանքանյութերի արդյունահանման արտոնագիր ստանալու նպատակով հնդիկ պաշտոնյաներին կաշառելու համար: Բիզնեսմենին 20 տարվա ազատազրկում է սպառնում, եթե նա մեղավոր ճանաչվի «ռեկետ» և «փողերի լվացում» հոդվածներով:
Forbes-ի գնահատմամբ՝ Ֆիրտաշի կարողությունը մոտ 400 մլն դոլար է:
