Րաֆֆի Հովհաննիսյանը այսօր դուրս եկավ հացադուլից: Հովհաննիսյանը հայտարարեց, որ հացադուլը նվիրում է Արցախի և Հայաստանի անկախության երկրորդ տասնամյակին:
«Ես ուժեղացած եմ, զորացած այս թեկուզ մի աստիճան ոգու բարձրացմամբ, բայց գործը տակավին ավարտված չէ»,- ասաց Րաֆֆի Հովհաննիսյանը:
Նրա խոսքով, սա Ազատության ծոմի առաջին արարի ավարտն էր, բայց պայքարը դեռ ավարտված չէ:
Հովհաննիսյանն ասաց հավաքվածներին, որ հայրենիքի մասին հոգ տանելով`ինքը թերացել է իր հայրական պարտականությունները կատարելու մեջ: «Իմ դստեր`Շուշիի ծննդյան օրը ընտանիքի հետ լինելը հացադուլից դուրս գալու պատճառներից մեկն է»:
Այս որոշումը կայացնելիս` Հովհաննիսյանը անսացել է իրեն ուղղված բոլոր կոչերին և բժիշկների հորդորներին:
Եզրափակելով խոսքը` Հովհաննիսյանը շնորհակալություն հայտնեց բոլոր մարդկանց, ովքեր իր կողքին են եղել այս 15 օրերի ընթացքում:
Ելույթից հետո Տեր Գրիգոր քահանան կատարեց հացադուլից դուրս գալու ծեսը, կարդաց աղոթքը և օրհնած հացը տվեց Հովհաննիսյանին:
Այս արարողությունից հետո Ազատության հրապարակում ելույթ ունեցան «Կարին» համույթը և Ռուբեն Հախվերդյանն ու նրա ընկերները:
