Վանաձորի Տիգրան Մեծ պողոտայում գտնվող «Օազիս» սրճարանի առջև հնչած կրակոցները, հավանաբար, տեղական ինքնակառավարման մարմինների ընտրությունների հետ կապված պատմության շարունակությունն են: Հիշեցնենք, որ նոյեմբերի 2-ին, ժամը 16։00–ի սահմաններում, ինքնությունը չպարզված անձը ապօրինի և դեռևս մակնիշը չպարզված հրազենից երկու անգամ կրակել է Վանաձոր քաղաքի բնակիչ, 1983 թվականին ծնված Արսեն Փերիխանյանի վրա ու դիմել փախուստի։ Տուժող Արսեն Փերիխանյանը տեղափոխվել էր Վանաձորի թիվ 1 հիվանդանոց, այնուհետեւ` Երեւան: Գնդակը դիպել էր տուժողի ազդրին: Մեր աղբյուրի փոխանցմամբ, Արսեն Փերիխանյանը ՏԻՄ` Վանաձորի քաղաքապետի ընտրություններից մեկում ներկայիս քաղաքապետ Սամվել Դարբինյանի մրցակից Էդիկ Խլղաթյանի թիմից է, եւ նրան ճանաչում են որպես «Խլղաթանց Արսեն»: Նա ՏԻՄ վերջին ընտրություններում եւս աշխատել է Սամվել Դարբինյանի մեկ այլ մրցակից Գագիկ Հովսեփյանի օգտին: Իսկ կրակողը, մեր աղբյուրների փոխանցմամբ, եղել է Շալո մականունով մեկը, ով Սամվել Դարբինյանի եղբոր որդու «զինվորներից» է: Շալոյի մասնակցությունը բացատրվում է նրանով, որ նա քրեական բնույթի ինչ-որ ռազբորկաներ է ունեցել Ռուսաստանի քրեական միջավայրում (նրան սխալ հանելու հարց է դրված եղել), ինչը հարթելուն օգնել են Դարբինյանները: Դեպքից հետո Վանաձորի ոստիկանություն են բերվել փախուստի դիմած Շալոյի ծնողները, որոնց հետո բաց են թողել:
Դեպքի առթիվ հարուցվել է քրեական գործ` քրեական օրենսգրքի 112 հոդվածի 2– րդ մասի 9-րդ կետով և 235 հոդվածի առաջին մասով։ Նախաքննություն է ընթանում։