Ճապոնիայում ֆոնդային բորսայում այսօր զգալի աճ է գրանցվել: Ճապոնիայի հիմնական բորսային ինդեքսը` Nikkei-ն, աճել է 2.4%-ով: Մարտի 30-ին Nikkei-ն աճել է 227.44 կետով` հասնելով 9687.52-ի: Սա առաջին զգալի աճն է մարտի 11-ի երկրաշարժից հետո, երբ սկսվել էին զգալի վաճառքները ֆոնդային բորսայում: Այս մասին հաղորդում է RBC-ն:
Աճը կապված է Ճապոնիայի արտարժույթի՝ իենի դիրքերի թուլացման հետ, ինչը բարերար ազդեցություն է ունենում տնտեսության վրա, առաջին հերթին` արտահանողների: Սակայն վերլուծաբանների կարծիքով` այս աճը կայուն չէ և կարող է անմիջապես փոխարինվել անկումով:
Nikkei-ի աճին նպաստել է մի շարք մեծ ընկերությունների բաժնետոմսերի գնի աճը. Canon` 1.54%, Casio Computer` 3.94%, Konica Minolta` 4.55%, Nikon Corp` 3.06%: Աճ են արձանագրել նաև Toyota-ն, Nissan-ը և Honda-ն, որոնց բաժնետոմսերն աճել են համապատասխանաբար 1.84%, 3.84% և 1.96%-ով:
Ֆոնդային բորսայի վրա շարունակում են բացասաբար ազդել վթարված ատոմակայանի չլուծված խնդիրը, ինչպես նաև երկրաշարժից հետո իրականացվող վերականգնողական աշխատանքների տեմպերը: