Ընդհանրապես ամեն այլընտրանքի բացակայություն՝ թե՛ Հայաստանում, թե՛ Արցախում մեծ վնաս է հասցնում Լեռնային Ղարաբաղի խնդրի խաղաղ կարգավորմանը: «Առաջին լրատվական»-ի հետ զրույցում նման կարծիք հայտնեց «Արցախի եվրոպական շարժում» հասարակական կազմակերպության նախագահ Հայկ Խանումյանը՝ խոսելով այն մասին, թե արդյո՞ք Հայաստանում ընդդիմության չգոյությունը և միահեծան իշխանական համակարգը վտանգավոր չէ ԼՂՀ հիմնահարցի խաղաղ կարգավորման համար. «Ընդհանրապես Հայաստանում առկա ժողովրդավարական տեսանկյունից՝ մենք կամաց-կամաց հետ ենք գնում: Նախորդ գումարման խորհրդարանում «Ժառանգություն»-կուսակցությունը ուներ թիմ, որը բավականին արցախանպաստ գործունեություն էր ծավալում, ցավոք սրտի, այս խորհրդարանում դա այլևս չկա: Սա միգուցե նաև հասարակության մեջ առկա երկրի քաղաքական արտացոլման հետևանքն է»,- ընդգծեց Հ. Խանումյանը:
Ավելի մանրամասնելով իր միտքը՝ Հայկ Խանումյանն ասաց, որ նման ընդդիմության պարագայում Հայաստանը կլինի լուրջ ճնշումների ներքո՝ տարբեր կառույցների, տարբեր բջիջների կողմից. «Հայաստանի հասարակությունը, բարեբախտաբար միայն քաղաքական բանաձևերով չի ապրում: Հայաստանում այժմ ձևավորվել է քաղաքացիական հասարակություն, որն էլ հենց մեր կյանքի, ձեռքբերումների և բարելավումների միակ հույսն ու ապավենն է»: